Հայաստանի և Ադրբեջանի արտգործնախարարների՝ առաջիկայում Ռուսաստանում կայանալիք հանդիպումից Լաչինի միջանցքի մասով բեկումնային արդյունքի չպետք է սպասել։ Այս հարցն արդեն գտնվում է ՌԴ-ի և Ադրբեջանի քննարկման տիրույթում. Հայաստանն այստեղ որևէ դերակատարություն չունի, որովհետև իրեն դուրս է դրել դրանից, Azg.am-ի թղթակցի հետ զրույցում նման տեսակետ հայտնեց քաղտեխնոլոգ Արմեն Բադալյանը։
«Թող որևէ մեկը հույս չունենա, որ հանդիպումը հայկական կողմի համար բեկումնային է լինելու. բեկումնային լինելու համար փաթեթային մեծ լուծում է անհրաժեշտ իրականացնել, որը չկա։
Քանի որ Արցախի հարցը ՀՀ իշխանությունների ուղղակի գործողությունների արդյունքում գտնվում է ինչպես Արևմուտքի, այնպես էլ Ռուսաստանի վերահսկողության ներքո, և նրանցից յուրաքանչյուրը ցանկանում է հարցը լուծել ի նպաստ իրեն, Ռուսաստանն, հարմար առիթ օգտվելով, ցանկանում է Միրզոյան-Բայրամով հանդիպում կազմակերպել։ Նա այսպիսով հնարավորություն է ստանում Արցախի մասով իր դիրքորոշումները ներկայացնել և վերահսկողության տակ պահել հարցի կարգավորումը։
Արևմուտքն էլ, բնական է, իր խնդիրներն ունի, և նա էլ ցանակնում է Արցախի հարցն իր վերսհսկողությա տակ պահել։
Քանի դեռ Ուկրաինայում վերջնական հստակեցումներ չկան, և առայժմ պարզ չէ՝ Մոսկվան, թե Կիևն է հաղթում պատերազմում, Արցախի հարցը պինգ պոնգի գնդակի նման նետվելու է մե՛կ Ռուսաստանի, մե՛կ Արևմուտքի դաշտ»,- ասաց քաղտեխնոլոգը։
Արմեն Բադալյանի կարծիքով՝ Հայաստանի և Ադրբեջանի ղեկավարությունները անթաքույց կերպով հակված են արևմտյան գործընթացներինայն է՝ Արցախը մնում է Ադրբեջանի կազմում և հայաթափվում։ Դրան հաջորդում է ռուսական զորակազմի՝ Արցախը լքելու գործընթացը։
Հիշեցնենք, որ ՌԴ ԱԳՆ պաշտոնական ներկայացուցիչ Մարիա Զախարովան հայտնել է՝ Ռուսաստանի տարածքում Հայաստանի և Ադրբեջանի արտգործնախարարների հանդիպման վերաբերյալ պայմանավորվածություն է ձեռք բերվել։
«Կոնկրետ ամսաթիվը կհայտարարվի ավելի ուշ»,- ասել է նա։
