Հայաստանյան հասարակությունը պետք է հասկանա, որ 2020 թվականի նոյեմբերի 9-ի համաձայնագիրը, որքան էլ այն լավը կամ վատը լիներ, ստստուս քվո էր ապահովում. որոշակի անորոշության պայմաններում մեզ հնարավորություն էր տրվում սպասելու, թե հետագայում ինչ է լինելու։ Բայց Նիկոլ Փաշինյանի համառ ջանքերով անցյալ տարվա հոկտեմբերի 6-ին Պրահայում կնքվեց պայմանագիր, որով նա վերախմբագրեց նոյեմբերի 9-ի համաձայանգրի կետերը. այդ կետերից մեկով էլ ասվում էր, որ Լաչինի միջանցքը պետք է անխափան աշխատեր, ԼՂ կարգավիճակն էլ պետք է քննարկվեր հետագայում։ Azg.am-ի թղթակցի հետ զրույցում այս մասին հիշեցրեց քաղաքագետ Երվանդ Բոզոյանը։
«Նոյեմբերի 9-ի համաձայանգիրը Նիկոլ Փաշինյանի ջանքերով առ ոչինչ է դարձել։ Որպեսզի ռուսական զորքը դուրս գա Արցախից, Փաշինյանը պետք է Արցախը ճանաչի Ադրբեջանի մաս։ Սրանով իսկ նա վերացնում է նոյեմբերի 9-ի համաձայնագիրը։
Այս պայմաններում, եթե Ռուսաստանն Ադրբեջանին հարց տա՝ ինչու է նա Լաչինի միջանցքում անցակետ տեղադրում, ադրբեջանցիները կպատասխանեն՝ նոյեմբերի 9-ի համաձայանգրով ԼՂ-ի ճակատագիրը դեռ անորոշ էր, բայց անցած տարվանից Նիկոլ Փաշինյանը համաձայնել է, որ ԼՂ-ն, այդ թվում՝ նաև Լաչինի միջանցքը, դառնան Ադրբեջանի տարածք։ Իսկ եթե Ադրբեջանի տարածք է դառնում, ինչո՞ւ պետք է Ադրբեջանը չկարողանա իր տարածքում անցակետ տեղադրել»,- ասաց քաղաքագետը։
Երվանդ Բոզոյանի համոզմամբ՝ քանի դեռ Փաշինայնը իշխանության ղեկին է, նշանակում է՝ հայ ժողովուրդը համակերպվել է Արցախն Ադրբեջանի կազմում տեսնելու մտքի հետ։
Հիշեցնենք, որ Արցախը Հայաստանին կապող միակ ճանապարհի` Լաչինի միջանցքի վրա Ադրբեջանի կողմից անցակետի տեղադրման փաստով Հայաստանը առաջիկա օրերին դիմելու է Արդարադատության միջազգային դատարան։ Այս մասին ավելի վաղ հայտարարել էր Միջազգային իրավական հարցերով ՀՀ ներկայացուցիչ Եղիշե Կիրակոսյանը։
