Փաշինյանի կողմից խաբված տավուշցիները վերջում լավագույն դեպքում դառնալու են գաղթական, վատագույն դեպքում՝ անգերեզման, թուրքի կողմից սպանված հայ. քաղաքագետ

Նիկոլ Փաշինյանն ինչպես որ Արցախը հանձնեց, այնպես էլ այսօր գնացել է Տավուշ՝ կեղծելու իրականությունը, բացահայտ ստախոսությամբ զբաղվելու, մարդկանց խաբելու, հույս տալու։ Բայց այդ մարդիկ վերջում լավագույն դեպքում դառնալու են գաղթական, վատագույն դեպքում՝ անգերեզման, թուրքի կողմից սպանված հայ։ Azg.am-ի թղթակցի հետ զրույցում նման տեսակետ հայտնեց քաղաքագետ Գագիկ Համբարյանը՝ անդրադառնալով ՀՀ վարչապետ Նիկոլ Փաշինյանի՝ Ոսկեպարի, Բաղանիսի և հարակից բնակավայրերի բնակիչների հետ այսօր կայացած հանդիպմանը։

«Նիկոլ Փաշինյանն իր ամպլուայի մեջ է. մարդը «Հաղթելու ենք» կարգախոսով 5 հազար մարդու տարավ սպանդի՝ շատ լավ իմանալով, որ գնում ենք պարտության։ Նա մի քանի անգամ դիտավորյալ զինադադար չի կնքել՝ իբրև թե հանրության կարծիքը հաշվի առնելով։ Այնինչ իր կեղծարարների միջոցով հանրությանը մանիպուլյացիայի էր ենթարկում՝ ասելով, որ հաղթելու ենք։ Վերջում ասաց՝ ասել եմ, որ հաղթելու ենք, հո չե՞մ ասել, որ հաղթում ենք։

Այնպես որ, նույն կարգավիճակն է. Տավուշ է գնացել՝ լոլոներ պատմելու, վաղը-մյուս օրն ադրբեջանցի զինվորականների և ագրեսիվ գյուղացիների թիրախն ու զոհը դառնալիք տավուշցիներին ինչ-որ բաներ բացատրելու՝ չասելով, սակայն, որ թուրքերը երբևիցե ցանկություն չեն հայտնում հայերի հետ հանգիստ ապրելու»,- նշեց Գագիկ Համբարյանը։

Քաղաքագետի կանխատեսմամբ՝ մեծ է հավանականությունը, որ Տավուշի մարզի տարածքներ Ադրբեջանին հանձնելուց հետո թշնամին կփակի ինչպես Վրաստան տանող ճանապարհը, այնպես էլ Հայաստան մտնող գազամուղը։

«ՀՀ իշխանություններն այժմ իբրև թե շրջանցիկ ճանապարհներ են կառուցում, բայց թուրքը թքած ունի. ռմբակոծելու է այդ ճանապարհները և թույլ չի տալու, որպեսզի դրանք օգտագործվեն։ Թշնամին ամեն ինչ անելու է, որպեսզի ստեղծի այդտեղ բնակվելու անելանելի պայմաններ, և տավուշցիները հանգիստ լքեն իրենց գյուղերը։ Նիկոլը նրանց փող է տալու, հաստատ իմացեք»,- համոզմունք հայտնեց մեր զրուցակիցը։

Գագիկ Համբարյանը շեշտեց՝ Նիկոլ Փաշինյանը մի քանի անգամ ժողովրդին խաբել-մարսելուց հետո ամենապարզունակ հարցերում շարունակում է մարդկանց մանիպուլյացիայի ենթարկել և այս անգամ ևս նույն կերպ կվարվի։

«Կրկնում եմ՝ Փաշինյանն այսօր գնացել է տավուշցիներին բացահայտ ասելու, որ այդ հողերը հանձնելու է։ Եվ համոզված եմ, որ չի գտնվի ոչ մի տավուշցի, որը կընդդիմանա նրան։ Եթե գտնվի էլ, նրան թույլ չեն տա խոսել, որովհետև նման հանդիպումներին սովորաբար յուրայիններ են մասնակցում։

Դուք կարծում եք, որ Արցախը հանձնած, ՀՀ տարածքներ թշնամուն տված , Փաշինյանն ինչ-որ ձևաչափով պետք է կաշկանդվի՞ որ թուրքերին է հանձնում հայրենի Տավուշը. բացառվում է»,- ասաց Գագիկ Համբարյանը։

Հիշեցնենք, որ Նիկոլ Փաշինյանի խոսնակ Նազելի Բաղդասարյանն ավելի վաղ լուսանկարներ էր հրապարակել՝ նշելով, որ Նիկոլ Փաշինյանը Ոսկեպարում հանդիպում է Ոսկեպարի, Բաղանիսի և հարակից բնակավայրերի բնակիչների հետ։