Երևանի ավագանու օրակարգում չզեկուցվող հարցեր ներառելը հակասում է քաղաքապետարանի աշխատանքի թափանցիկությանը , Azg.am-ի թղթակցի հետ զրույցում ասաց «Ազգային առաջընթաց» խմբակցության անդամ Իզաբելա Աբգարյանը՝ անդրադառնալով «Մայր Հայաստան» խմբակցության ղեկավար Մանուկ Սուքիասյանի և «Ազգային առաջընթաց» խմբակցության ղեկավար Արամ Թորոսյանի դիրքորոշմանը՝ օրակարգի բոլոր հարցերը դարձնել զեկուցվող, հակառակ պարագայում իրենք չեն մասնակցի օրակարգային հարցերի քննարկմանը։
«Անձամբ ես դեռ վաղուց եմ կարծիք հայտնել՝ այն ժամանակ, երբ ընդունվում էր այդ չարաբաստիկ նախագիծը։ Ես միշտ դեմ եմ արտահայտվել չզեկուցվող հարցերին՝ նշելով, որ մեկ փաթեթով կարող է ծածկադմփոց արվել՝ ինչ հարց ցանկանան՝ ներառեն, և դա չզեկուցվի։ Ամենակարևորն այն է, որ ավագանու անդամն այդ պարագայում զրկվում է տվյալ խնդրի շուրջ հարցեր տալու կամ ելույթ հնչեցնելու հնարավորությունից։ Այդ պարագայում քո քվեն անիմաստ է դառնում։
Մենք գիտենք, որ օրենքով ամրագրված է՝ Երևանի ավագանու նիստերը պետք է հրապարակային լինեն, և դրա համար էլ հենց ուղիղ եթեր է ապահովվում։ Ինքնին պարզ է, որ ուղիղ եթերով պետք է հեռարձակվի ոչ թե ավագանու անդմաների արտաքին տեսքը, այլ նախագծերի ամբողջ բովանդակությունը։ Ինչու. որպեսզի քաղաքացիները տեղյակ լինեն՝ ով ինչ դիրքորոշում ունի, ավագանու յուրաքանչյուր անդամ ինչպես քվեարկեց և այլն»,- նշեց Իզաբելլա Աբգարյանը։
Երևանի ավագանու անդամը շեշտեց՝ անթույլատրելի է, որ չզեկուցվող հարցերի նախագիծը եկել է գործադիրից. ավագանու ընդդիմադիր խմբակցությունների կամ անկախ անդամների կարծիքը ոչ ոք չի հարցրել։
«Բերեցին և «Իմ քայլ»-ով նախագիծն անցկացրեցին, ինչն անթույլատրելի է։ Ավագանին ինքը պետք է որոշի իր նիստերի ձևաչափը՝ առավել ևս, որ այս ընտրություններից հետո ունենք զգալի ընդդիմություն։ Պետք է նստենք և հասկանանք՝ որ հարցերը որևէ կերպ չեն կարող դառնալ չզեկուցվող, օրինակ՝ հողի նշանակության փոփոխության հարցը, որն այս իշխանությունը նախորդ անգամ էլ բերում էր չզեկուցվող ձևաչափով։
Սա իր մեջ մեծ ռիսկեր է պարունակում, որովհետև շենքերի շինարարության հարցում ավագանու միակ լծակը հենց հողի նշանակությունը չփոխելն է, եթե դեմ ես, որ այդ շենքը կառուցվի։ Դեպք է եղել, որ բնակիչները հենց Երևանի ավագանու նիստին հետևելով են տեղեկացել, որ հողի նշանակությունը պետք է փոխվի և սոցցանցերում մեզ նշելով՝ գրել էին նման բան չանել, որովհետև դա պուրակ է, որն ուզում են վերածել բնակելի թաղամասի։ Մենք հենց այդ օրը հանել ենք նախագիծը՝ գնալու և բնակիչներին հանդիպելու»,- ասաց Իզաբելլա Աբգարյանը։
Մեր զրուցակիցը տեղեկացրեց, որ իրենց խմբակցությունը Երևանի ավագանու օրակարգ նախագիծ է ներկայացնելու, ըստ որի պետք է որոշվի՝ քաղաքացիների համար որևէ հետաքրքրություն չներկայացնող որ խմբի հարցրը կարող են չզեկուցվել։
