Այս պահին ստորագրահավաքն ընթանում է բնականոն հունով, սադրանքներ հրահրող քաղաքացիները մոտ մեկ ժամ առաջ հեռացել են ստորագրահավաքի տարածքից։ Azg.am-ի թղթակցի հետ զրույցում այս մասին ասաց լրագրող, Մարտունիում «ՀայաՔվե» նախաձեռնության համակարգող Նաիրի Հոխիկյանը՝ անդրադառնալով լրատվամիջոցներում տարածված այն տեղեկություններին, որ այսօր առավոտյան Մարտունիում մի խումբ տղամարդիկ «ՀայաՔվեի» ստորագրահավաքի վայրի մոտակայքում սադրել և քաշքշել են իրեն։
«Արդեն երրորդ օրն է, որ Մարտունիում ստորագրահավաք է իրականացվում։ Առաջին երկու օրը բավական ակտիվություն կար, ինչը, բնականաբար, անհանգստացրեց որոշ անձանց։ Այսօր առավոտյան արդեն սկսեցին սադրանքներ հրահրել. մարդիկ էին մոտենում, կռիվ անում, սպառնում, որ հեռանանք այստեղից։ Իշխանության ներկայացուցիչները կամ նրանց հետ փոխկապակցված անձինք արդեն իսկ ստորագրած որոշ քաղաքացիների համոզել էին գալ և հետ վերցնել իրենց ստորագրությունները, որովհետև «ՀայաՔվեն», իբրև թե, խաբեություն է և կազմակերպված է ոչ թե Արցախի փրկության, այլ ՀՀ երկրորդ նախագահ Ռոբերտ Քոչարյանի համար»,- ասաց Նաիրի Հոխիկյանը՝ հավելելով, որ քաղաքացիներին բացատրել է՝ նման պնդումներն ուղղակի անտրամաբանական են։
Մեր զրուցակիցը միաժամանակ ընդգծեց, որ Մարտունու համայնքապետ Հովհաննես Հովիկյանն իրեն շատ ադեկվատ և զուսպ է դրսևորում, համագործակցում ստորագրահավաքի կազմակերպիչների հետ։
«Այս պահին իրավիճակը հանգիստ է, ավելին՝ քաղաքապետարանի դիմաց ինֆորմացիոն կենտրոն ենք տեղադրել և մարդկանց տեղեկացնում ենք «ՀայաՔվե»-ի բնույթի մասին։ Ոստիկանությունը պարբերաբար տարածքում շրջայց է կատարում, տեղեկացրել ենք, որ որոշակի սպառնալիքներ կան, խնդրել ենք՝ ապահովեն, որպեսզի մեզ չներքաշեն սադրանքի մեջ։ Մենք ոստիկանությունից խնդրել ենք ապահովել օրենսդրական այս նախաձեռնության օրինական ընթացքը։
Ինչ վերաբերում է մասնակցությանը, ապա ստորագրահավաքը առաջին երկու օրերի նման է, տեմպը գրեթե չի փոխվել։ Ուղղակի տարբեր պետական կառույցների աշխատակիցներից տեղեկություններ, զանգեր եմ ստանում, երբ մարդիկ ներողություն են խնդրում, որ չեն կարող գալ, ստորագրել, քանի որ վերևներից զգուշացրել են չմասնակցել, որովհետև աշխատանքից կհեռացվեն»,- ասաց Նաիրի Հոխիկյանը։
Մեր զրուցակիցը նշեց, որ թեև այս պահին արդեն ֆիքսել են՝ կոնկրետ իրենց մոտ ընդհանուր թվով քանի ստորագրություն է հավաքվել, սակայն առաժմ թվեր չեն բարձրաձայնի։
«Համենայն դեպս, ՀՀ մարզերի մեջ ամենաբարձր թվերից մեկն է»,- ասաց Հոխիկյանը։
