Անվտանգության ոլորտում մենք որոշակի դիվերսիֆիկացիա ունենք, տնտեսության ոլորտում դեռ շատ աշխատանքներ ունենք կատարելու, որ կարողանանք դիվերսիֆիկացնել, և այստեղ ԵՄ երկրներին դիտարկում ենք որպես կարևոր գործընկերներ: Այսինքն՝ անվտանգության ոլորտում մեծ հաջողություններ ունենք դիվերսիֆիկցիայի հարցում, բայց նույնը չենք կարող ասել էկոնոմիկայի ոլորտի մասին: «ՀՀ-Արևելյան գործընկերություն-ԵՄ. գործընկերության մարտահրավերները և հնարավորություններ» թեմայով քննարկման ժամանակ այս մասին հայտարարեց ԱԽ քարտուղար Արմեն Գրիգորյանը։
«Այստեղ բազմաշերտ բազմաթիվ խնդիրներ կան, որոնց լուծման համար մեծ աշխատանք է տարվում, և պատահական չէ, որ ապրիլի 5-ի առաջնահերթ օրակարգային խնդիրները հենց տնտեսական են եղել, դիմակայունության և դիվերսիֆիկացիայի մասին են եղել: Որոշ դեպքերում երկարաժամկետ ենք փորձում հարցերը լուծել:
Օրինակ՝ նոր ատոմակայանի կառուցման հետ կապված՝ մենք մտել ենք շատ առարկայական փուլ: Այսինքն՝ մենք ԱՄՆ-ի հետ քննարկում ենք իրավապայմանագրային դաշտը կարգավորելու հարցը: Առանց այդ դաշտի մենք չենք կարող առաջ ընթանալ:
Այս պահին կարող եմ ասել, որ գնդակն ԱՄՆ-ի դաշտում է, մենք ակնկալում ենք ԱՄՆ-ի մեր համակարգային պրոցեդուրաները, որ անցնեն, այնուհետև մենք կսկսենք աշխատել հենց դիվերսիֆիկացիայի ուղղությամբ»,-ասաց ԱԽ քարտուղարը:
Անդրադառնալով գյուղապրանքներին, Արմեն Գրիգորյանը նկատեց՝ երբ քննարկում ենք մեր տարբեր ապրանքների մուտքը ԵՄ, նաև պետք է հաշվի առնենք ԵՄ-ում տեղի ունեցող քաղաքական քննարկումները:
