Մենք նպատակահարմար գտանք խնդրել ռուս գործընկերներին՝ հեռանալ օդանավակայանից, հեռանալ մի քանի վայրերից, որտեղ նրանք հսկում էին հայ-ադրբեջանական սահմանը։ Եթե նպատակահարմար համարենք, կսկսենք խոսել Գյումրիի ռուսական ռազմաբազայի մասին, բայց այս պահին մենք դա չենք քննարկում։ Այս մասին ռուսական ընդդիմադիր Дождь հեռուստաալիքին տված հարցազրույցում ասել է ՀՀ Ազգային ժողովի նախագահ Ալեն Սիմոնյանը՝ պատասխանելով հարցազրուցավարի հարցին այն մասին, որ Երևանից հավաստիացումներ են հնչում, թե Գյումրիում գտնվող 102-րդ ռազմաբազան չի փակվի. արդյոք այն ծառայու՞մ է Հայաստանի շահերին։
«Եկեք նայենք քարտեզին, թե որտեղ է գտնվում Հայաստանը և ինչ մարտահրավերներ ունի։ Ենթադրենք` ես չեմ ասում, որ ռուսական ռազմաբազան հարյուր տոկոսանոց երաշխիք է այն ամենի, ինչ հնարավոր է, բայց, միևնույն ժամանակ, մեր տարածաշրջանում, առավել ևս՝ ներկայիս իրավիճակում, սրել և շատ կտրուկ քայլեր անելը սխալ է։ Գուցե դա լավ հնչի, բայց ռեալ քաղաքականության մեջ, իրականում դա այդպես չէ»,-նշել է Սիմոնյանը
Հարցին՝ բացառո՞ւմ է, որ ռազմաբազան Գյումրիից հանելու դեպքում Ռուսաստանը կարող է ներխուժել Հայաստան, ինչպես եղավ Ուկրաինայի դեպքում, Ալեն Սիմոնյանը պատասխանել է, որ չգիտի, հակառակի երաշխիք չկա։
Ինչ վերաբերում է Մոսկվայի հետ հարաբերություններին, ըստ խորհրդարանի խոսնակի, դրանք եղել են և կլինեն այն մակարդակի վրա, որը կհամադրվի Հայաստանի Հանրապետության շահերի հետ։
«Ուզում եմ՝ հստակ լինի. այն, ինչ ասել եմ Մոսկվայում, այն քաղաքականությունն է, որն ընտրել է Հայաստանը։ Մենք չենք պատրաստվում թռչել մի բևեռից մյուսը։ Եվ մեզ համար (Դուք խոսեցիք կախվածության մասին) կախվածությունից դուրս գալու առաջին փուլն այն էր, որ Հայաստանում 2018 թվականից անցկացվում են արդար և թափանցիկ ընտրություններ, որոնք կասկած չեն հարուցում ոչ մեկի, նույնիսկ ընդդիմության համար, որը պարտվում է կամ որոշ քաղաքներում հաղթում է այդ ընտրություններում։ Այսինքն՝ սա կախվածությունից հեռանալու առաջին քայլն է»,- ասել է Ալեն Սիմոնյանը։
Միաժամանակ, ըստ նրա, 2018 թվականից հետո «մեզ այլևս այնտեղից չեն նշանակում, որովհետև մինչև հեղափոխությունը կասկածներ ունեմ, որ այդ ամենը մշտապես համաձայնեցվել է»։
«Արտաքին քաղաքականությունն իրականացվում է «այն, ինչ ձեռնտու է Հայաստանին, այդպես էլ կվարվենք» սկզբունքով։ Բնականաբար, կան պայմանավորվածություններ, կա փոխգործակցություն բոլոր երկրների հետ, և Ռուսաստանի հետ քաղաքականությունը մենք նույնպես հավասարակշռելու ենք՝ լինի դա Վենսը, լինի դա Միացյալ Նահանգները, թե Ֆրանսիան, Եվրամիությունը. սկզբունքն այսպիսին է»,- նշել է Ազգային ժողովի նախագահը։
