Իրանը հարաբերություններ ունի Հայաստանի հետ, մինչդեռ Հայաստանը չի հասկանում՝ ինչ հարաբերություններ ունի Իրանի հետ։ Պատճառն այն է, որ Հայաստանի Հանրապետությունն արտաքին քաղաքականություն, որպես այդպիսին, չի վարում։ Azg.am-ի թղթակցի հետ զրույցում նման տեսակետ հայտնեց վերլուծաբան Ստեփան Դանիելյանը՝ անդրադառնալով Հայաստանում Իրանի արտակարգ և լիազոր դեսպան Մեհդի Սոբհանիի այն հայտարարությանը, որ Իրանը ցանկանում է Հայաստանի հետ երկարաժամկետ ռազմավարական հարաբերություններ ունենալ։
Ըստ մեր զրուցակցի՝ Հայաստանն առհասարակ արտաքին քաղաքականություն չունի՝ ո՛չ երկարաժամկետ, ո՛չ կարճաժամկետ, և ՀՀ իշխանություններն զուտ պահի քաղաքականություն են վարում՝ ելնելով այս կամ այն իրավիճակից, մեկ-երկու օրվա կտրվածքով։
«Իսկ Իրանն իր անվտանգության հետ կապված շատ կոնկրետ շահեր ունի, և Հայաստանն այդ առումով նրա համար շատ կարևոր է։ Ընդ որում՝ Իրանն արդեն չի նայում այն բանին, թե Հայաստանում ովքեր են եկել իշխանության, ինչ են նրանք անում։ Իրանը Հայաստանին ուղղակի դիտում է որպես տարածք, որն իր անվտանգության համար կարևոր է։ Սա է ամբողջը»,- ասաց Ստեփան Դանիելյանը։
Վերլուծաբանը շեշտեց՝ Հայաստանում չկա կառավարություն, որը հասկանալի քաղաքականություն կվարի կամ կհասկանա՝ ինչպիսին է լինելու Հայաստանի ապագան։
«Իրանն, իր շահերից ելնելով, գոնե այս պահին թույլ չի տալիս, որ Թուրքիան և Ադրբեջանը հարձակում գործեն Հայաստանի տարածքի վրա։ Իհարկե, ես չեմ կարող ասել, թե այս իրավիճակը որքան կձգվի, որովհետև ամեն օր աշխարհում մի նոր բան է խառնվում, նոր պատերազմ է սկսվում։
Բայց որ Իրանը զսպիչ գործոն է, որը Թուրքիային և Ադրբեջանին հետ է պահում Հայաստանի վրա հարձակվելուց, ակնհայտ է»,- ասաց մեր զրուցակիցը։
Հիշեցնենք, որ Հայաստանում ԻԻՀ արտակարգ և լիազոր դեսպան Մեհդի Սոբհանին այսօր խորհրդարանում ասել է՝ Հայաստանն այսօր գտնվում է պատմության զգայուն ոլորաններում։
Նա ընդգծել է նաև տնտեսական համագործակցության առաջնահերթությունը՝ նշելով, որ քաղաքական հարաբերությունները պետք է հարթեն տնտեսական հարաբերությունների ճանապարհը: Դեսպանը կարևորել է ենթակառուցվածքների ճիշտ գործարկումը:
«Մենք ցանկանում ենք Հայաստանի հետ ունենալ երկարաժամկետ ռազմավարական հարաբերություններ»,- նշել է դեսպան Մեհդի Սոբհանին:
