Իրանի նորընտիր նախագահ Մասուդ Փեզեշքիանը ներկայացնում է ազգային փոքրամասնություններին՝ հատկապես ադրբեջանցիներին և նաև իրանական խորհրդարանում ներկայացնում է իրանաթուրքական հանձնաժողովը։ Այսպիսով, պետք է գիտակցել, որ նա ամեն ինչ անելու է՝ բարելավելու Իրանի, Թուրքիայի ևԱդրբեջանի հարաբերությունները։ Azg.am-ի թղթակցի հետ զրույցում նման տեսակետ հայտնեց Կովկաս ինստիտուտի փորձագետ Հրանտ Միքայելյանը։
«Պահպանողական կուրսի պարագայում Իրանը վերջին տարիների ընթացքում սկսել է աջակցել Հայաստանին։ Այստեղ փոփոխություններ կլինեն, բայց համոզված չեմ, որ դրանք կլինեն արմատական. գոնե սկզբնական փուլում դրանք լինելու են մակերեսային, այսինքն՝ հաստատվելու է ավելի տեղեկատվական և քաղաքական ֆոն, ինչն ինքնին բավականին կարևոր է և կարող է չեզոքացնել Իրանի հնարավոր աջակցությունը Հայաստանին։
Մինչդեռ բազմաթիվ անգամներ նույն Իրանի ղեկավարությունից լսել ենք, որ եթե Ադրբեջանը «միջանցքի» հաստատմամբ խախտի ՀՀ տարածքային ամբողջականությունը և փորձի խզել Հայաստանի և Իրանի միջև կապը, ապա Իրանը կգործի ռազմական ձևաչափով»,- նշեց մեր զրուցակիցը։
Հրանտ Միքայելյանի խոսքով՝ այն մարդիկ, որոնք համոզված են, որ Արևմուտքն իր հայտարարություններով զսպում է Ադրբեջանին, այժմ կիմանան, թե այսքան տարի իրական ինչ ուժ է Բաքվին զսպել։
«Որովհետև իրականում Իրանն է զսպում Ադրբեջանին, ոչ թե Արևմուտքն՝ իր հայտարարություններով»,- ասաց Հրանտ Միքայելյանը։
Ինչ վերաբերում է Իրանի նորընտիր նախագահի՝ այլ ուղղություններով աշխատանքներին, ըստ փորձագետի՝ վերջինս փորձելու է մեղմացնել վերջին տարիներին Իրանում հաստատված բավականին կոշտ պահպանողական կուրսը։
«Նա, իհարկե, որոշ հոգևորականների հետ հակասության մեջ է մտնելու, բայց քանի որ փոփոխություններրի լայն պահանջ կա, կարծում եմ՝ այստեղ Մասուդ Փեզեշքիանը հաջողելու է։ Նա նաև փորձելու է բարելավել Միացյալ Նահանգների հետ հարաբերությունները։ Բայց այստեղ ամեն ինչ նրանից կախված չէ. շատ բան կախված է լինելու ԱՄՆ-ից։ Մասնավորապես, եթե ԱՄՆ նախագահ ընտրվի Թրամփը, ապա նա բավական լրջորեն աջակցելու է Իսրայելին, և այսպիսով համոզված չեմ, որ այստեղ հաջողություն հնարավոր է։ Թեև գուցե նա փորձելու է տարանջատել ԱՄՆ-ի և Եվրամիության հետ հարաբերությունները. Թրամփի օրոք դա գուցե ստացվի»,- ասաց փորձագետը։
Հրանտ Միքայելյանն ընդգծեց՝ Իրանը որքան քիչ հակամարտությունների մեջ ներգրավված լինի, այնքան Հայաստանի համար անվտանգային ֆոնը կաճի։ Եվ հակառակը՝ որքան Իրանը շահագրգռված չէ չեզոքացնել արտաքին վտանգները, այդքան ավելի թեթև է նայելու թուրքական վտանգին։
«Փեզեշքիանը փորձում է բարձրացնել ադրբեջանցիների, բելուջների կարգավիճակը, ինչը կարող է նպաստել ադրբեջանական սեպարատիզմին։
Ինչ վերաբերում է Հայաստանի հետ հարաբերություններին, չեմ կարծում, որ Հայաստանի նկատմամբ Իրանն այնքան նախաձեռնողական կլինի, որքան անցյալում։ Պահպանողական ուժերը, որոնք ավելի կողմնակից էին Հայաստանի հետ երկխոսությանը, նրանք փորձելու են պահպանել ազդեցությունը։
Հայաստանն իր հերթին պետք է շատ ավելի ադեկվատ և նախաձեռնող լինի, որպեսզի որևէ բանի հասնի։ Իրանի հետ հարաբերություններում Հայաստանը պետք է օրակարգ ձևակերպի, գիտակցի անվտանգային լրջագույն մարտահրավերները և կառուցի ռազմական ու ռազմավարական հարաբերություններ այդ երկրի հետ»,- ամփոփեց Հրանտ Միքայելյանը։
