Երբ Ռուսաստանի արտգործնախարար Սերգեյ Լավրովը հայտարարում է, որ ՌԴ-ն համաձայն է Հայաստանում ՀԱՊԿ զորամիավորումներ տեղակայել, դրա տակ պետք է հասկանալ Ռուսաստանի զորամիավորումներ։ Պարզապես ամբողջ հարցն այն է, թե ինչ խնդիր է փորձ արվում դրանով լուծել, Azg.am-ի թղթակցի հետ զրույցում ասաց վերլուծաբան Ստեփան Դանիելյանը։
«Ակնհայտ է, որ խնդիրը ճանապարհների մասին է, այսինքն՝ Ռուսաստանն, ըստ էության, ինչ-որ պայմաններ էր ուզում, ինչ-որ ճանապարհների կոնֆիգուրացիաներ։ Պատահական չէ, որ Սերգեյ Լավրովը նաև հայտարարեց՝ ԱՄՆ-ը Հայաստանին առաջարկում է իր տարածքից դուրս քշել ռուսներին։
Այստեղ խոսքը գնում է ճանապարհների մասին, այսինքն՝ այս ամենին պետք է նայել ոչ թե պարզունակ տեսանկյունից՝ Հայաստանը ՀԱՊԿ առաքելության տեղակայմամբ ավելի պահով կլինի, թե ոչ, այլ, թե ով ինչ է առաջարկում. Ռուսաստանն ինչ է առաջարկում, Արևմուտքն՝ ինչ»,- ասաց վերլուծաբանը։
Ստեփան Դանիելյանի համոզմամբ ՝ խնդիրը ճանապարհների մասին է, որից էլ բխում է մնացած ամեն բան՝ անվտանգություն, եկամուտներ, վտանգներ և այլն։
«Իրականությունն այն է, որ այս պահին Ռուսաստանի և Արևմուտքի միջև պայքար է գնում՝ Հայաստանի, Ադրբեջանի, Հյուսիս-Հարավ ճանապարհների, երկաթգծերի մասով՝ որտեղ կառուցել, որտեղ՝ չկառուցել, որը բացել, որը՝ ոչ։ Ամերիկան ոչ միայն ուզում, այլև բացահայտ հայտարարում է Ռուսաստանին տարածաշրջանից դուրս մղելու մասին։
Իսկ ահա Լավրովի հայտարարությունները ոչ ճշգրտում, ոչ էլ մեկ այլ բան էին, այլ զուտ իրավիճակի մասին Ռուսաստանի տեսակետներ»,- ասաց վերլուծաբանը։
Հիշեցնենք, որ ՌԴ արտգործնախարար Սերգեյ Լավրովը «Ցարգրադ» հեռուստաալիքին տված հարցազրույցում ասել էր՝ եթե Երևանը հաստատեր ՀԱՊԿ առաքելության տեղակայումը, Հայաստանը կշահեր և կստանար ավելի կայուն իրավիճակ։
Նա նաև ընդգծել էր, որ ԱՄՆ-ը Հայաստանին առաջարկում է «ռուսներին դուրս քշել» իր տարածքից և օգնել անվտանգության ապահովմանը։
