Արցախը բառի բուն իմաստով պաշարված է, և դա տեղի է ունենում քաղաքակիրթ աշխարհի աչքի առջև, Azg.am-ի թղթակցի հետ զրույցում ասաց ԱՀ նախագահի խորհրդակա Դավիթ Բաբայանը՝ անդրադառնալով Լաչինի միջանցքով մարդասիրական օգնության տեղափոխման դադարեցմանը։
«Մեկ բառ անգամ չի խոսում այսպես կոչված Միշել Չեմբեռլենը (նկատի ունի ԵՄ խորհրդի նախագահ Շառլ Միշելին՝ խմբ)։ Մենք բարդ վիճակում ենք։ Գարուն է, գյուղերից կանաչեղեն, ինչ-որ բաներ բերում են, բայց իրավիճակը շատ բարդ է։ Արցախում կտրոնային համակարգ է, պարենամթերքի հետ կապված լուրջ խնդիրներ կան։ Խնդիրներ կան նաև դեղորայքի, մնացած ապրանքների մասով։
Արցախում հումանիտար աղետ է, գազ չկա, հովհարային աջատումներ են, վաղը կարող է առհասարակ ամեն ինչ վերջանալ, որովհետև Սարսանգի ջրամբարը ցամաքում է։ Սա է իրավիճակը»,- ասաց Դավիթ Բաբայանը։
ԱՀ նախագահի խորհրդականը շեշտեց՝ հետագա անելիքները հստակեցնելու համար Արցախը կարիք ունի պատասխաններ ստանալու բոլոր շահագրգիռ կողմերից։
«Եվրոպան իր զզվելի, գարշելի պատասխանը Շառլ Միշելի շուրթերով տվել է։ Փաստորեն նա Արցախը համարում է Ադրբեջանի մաս։ Միշելը պապանձվել է, ոչ մի բան չի խոսել Արցախի շրջափակման, Հաագայի դատարանի որոշման մասին։ Սա իսկակական խայտառակություն է։
Հիմա պետք է սպասենք, տեսնենք՝ հավաքական Արևմուտքն ինչ է մտածում, որովհետև Եվրոպան հավաքական Արևմուտքի միայն կրտսեր հատվածն է։ Առանց հիստերիայի, առանց որևէ մեկից նեղանալու (եթե նեղանալու լինենք, ինքներս մեզնից պետք է նեղանանք)՝ պետք է պատասխաններ ստանանք ԱՄՆ-ից, Ռուսաստանից և իհարկե Հայաստանից»,- ասաց Դավիթ Բաբայանը։
Հիշեցնենք, որ ԿԽՄԿ հայաստանյան գրասենյակի հաղորդակցման և կանխարգելման ծրագրերի ղեկավար Զառա Ամատունին մեզ հետ զրույցում ասել էր՝ աս ընթացքում Լաչինի միջանցքով մարդասիրական օգնության դադարեցումը պայմանավորված է որոշում կայացնողների հետ որոշակի ընթացակարգերի ճշգրտման անհրաժեշտությամբ։
