Քաղաքագետ Ռոբերտ Ղևոնդյանը տպավորություն չունի, որ երեկվա ասուլիսում ՀՀ վարչապետ Նիկոլ Փաշինյանն ակնարկում էր Հայաստանի Հանրապետության կողմից հերթական միակողմանի զիջումների մասին։ Ղևոնդյանի կարծիքով՝ վերջինս խոսում էր այն մասին, որ Հայաստանի Հանրապետության՝ իր ցուցադրած մակետից դուրս գտնվող տարածքները վերադարձվելու են, սակայն տրամաբանությունն այն է, որ վերադարձվելու են ընդհանուր գործընթացի մեջ՝ ոչ թե պարզապես առանձնացվելու և վերադարձվելու են։
«Ամեն դեպքում՝ Նիկոլ Փաշինյանը հստակ չպատասխանեց, թե դա որ փուլում է տեղի ունենալու։ Նա խոսեց այն մասին, որ տարբեր մոտեցումներ կան։ Տեսնենք, թե մոտեցումներից որը կաշխատի։ Գուցե առաջին փուլում դրա մասին են խոսում, հետո՝ Սյունիքի կամ այլ հատվածների, որովհետև հատվածներ էլ կան, որտեղ ադրբեջանցիները պետք է հետ քաշվեն»,- Azg.am-ի թղթակցի հետ զրույցում ասաց Ռոբերտ Ղևոնդյանը։
Նրա խոսքով՝ Նիկոլ Փաշինյանը երեկ խոսում էր ընդհանուր տրամաբանության մասին։
«Այսինքն՝ տեղեր կան, որ մենք պետք է հետ գանք, տեղեր կան՝ ադրբեջանցիները պետք է հետ գնան։ Բայց բնական է, որ վստահություն չկա, որ եթե առաջինը մենք հետ քաշվենք, ադրբեջանցիները չեն ստի։ Նույն բանի մասին էլ Փաշինյանն ասաց. գուցե վստահություն չկա, որ ադրբեջանցիները հետ կգնան»,- ասաց քաղաքագետը։
Ռոբերտ Ղևոնդյանի համոզմամբ՝ ադրբեջանական կողմը կարող է սադրանքների դիմել, և Հայաստանը պետք է պատրաստ լինի պատասխանել դրանց՝ անկախ նրանից՝ սադրանքները Փաշինյանի ցուցադրած մակետից ներս, թե դուրս են գրանցվում։
«Որովհետև ակնհայտ է, որ կան այդ մակետից դուրս հատվածներ, որոնք այս պահին Հայաստանի վերահսկողության ներքո են։ Ամեն դեպքում, երեկվա նրա խոսքից դա ակնհայտ դարձավ։
Կարծում եմ՝ եթե համաձայնություն ձեռք բերվի, որ մերոնք այդ հատվածներից հետ քաշվեն, ապա տրամաբանական կլինի, եթե դա զուգահեռվի այլ հատվածներում ադրբեջանցնցիների հետ քշվելու հետ։ Այստեղ արդեն իշխանության գործն է՝ առաջինը որ գործողությունը կարվի՝ մե՞նք, թե նրանք հետ կգնան, թե գործընթացը միաժամանակ տեղի կուեննա։
Իհարկե, լավ կլիներ, որ դա միաժամանակ լիներ, բայց մենք իրականում չգիտենք, թե բանակցային սենյակում ինչ է տեղի ունենում»,- ասաց մեր զրուցակիցը։
Քաղաքագետը միաժամանակ շեշտեց՝ ճիշտ կլիներ, որպեսզի երեկվա ասուլիսի մասնակիցներից մեկնումեկը Նիկել Փաշինյանից ճշգրտեր ՝ վերջինիս ցուցադրած ՀՀ մակետն ի վերջո ներառում է 29 800 ք/կմ, թե՞ 29 743 ք/կմ տարածք։ Մինչդեռ նման հարց այդպես էլ չհնչեց։
Հիշեցնենք, որ երեկ տեղի ունեցած մամուլի ասուլիսի ժամանակ Նիկոլ Փաշինյանը հայտարարել էր.
«Անցյալ շրջանի մի դրվագի մասին խոսեմ, որը վերաբերում է 29 800 քկմ-ին: Երբ բանակցություններում խոսք գնաց, որ պետք է ճանաչել միմյանց տարածքային ամբողջականությունը, Ադրբեջանը հայտարարում է, որ ճանաչում է ՀՀ տարածքային ամբողջականությունը և տարածքային պահանջներ չունեն:
Ինչո՞ւ է շարունակվում այդ խոսակցությունը, մի պարզ պատճառով: Բրյուսելի բանակցային սենյակում այդ հարցը ծագեց՝ իսկ ի՞նչ նկատի ունի Ադրբեջանը Հայաստանի տարածքային ամբողջականություն ասելով: Ինչ նկատի ունի Հայաստանը Ադրբեջանի տարածքային ամբողջականություն ասելով:
Այս ընթացքում, է որ խոսակցությունը զարգացավ դեպի այն կետը, որ երևի կան օբյեկտիվ տվյալներ, և պետք է հղում անել այդ տվյալի վրա: Գաղափարն ընդհանուր առմամբ դիտարկելի էր, եւ քննարկելի էր: Մենք ասացինք՝ շատ լավ, բայց մի րոպե, ի՞նչ թիվ: Պատկերացրեք իրադրության լարումը, որ կողմերը պետք է ասեն՝ մեր երկրի տարածքը այսքան է»,- ասել է նա:
Ըստ Փաշինյանի հենց այդտեղ առաջացավ գաղափար, որ եկեք ուրեմն, հետո որ դուրս գանք, հայտարարենք այն թիվը, որը ֆիքսված է խորհրդային հանրագիտարանների վերջին հրատարակության մեջ:
«Այդ տվյալները փոխանցվեցին ԵՄ խորհրդի նախագահին և նա այդ թվերը հրապարակեց: Հետո պարզվեց, որ 29 800 թիվը կլորացրած է և տեքստի մեջ կա ուրիշ թիվ՝ 29 743 քկմ: Այդ թվում ադրբեջանական կողմը մեր ուշադրությունը հրավիրեց այն փաստի վրա, որ Հայաստանի պետական մարմինների կայքերում Հայաստանի տարածքը 29 800-ից պակաս է գրված:
