Ադրբեջանի՝ 86.6 հազար կիլոմետր քառակուսին ներառում է նաև Լեռնային Ղարաբաղը: Բայց նաև պետք է արձանագրել, որ մենք ասում ենք, որ Լեռնային Ղարաբաղի հայության և իրավունքների, անվտանգության հարցը պետք է քննարկվի Բաքու-Ստեփանակերտում ձևաչափում, այսօր հրավիրված մամուլի ասուլիսի ժամանակ ասաց Փաշինյանը:
Անդրադառնալով գործող կառավարության դիրքորոշմանը՝ վարչապետն ասաց՝ Հայաստանի այսօրվա կառավարությունն ինչ ասի-չասի, ՀՀ բոլոր կառավարությունները ճանաչել են Ադրբեջանի տարածքային ամբողջականությունը:
«86.6 հազար քառ. կմ տարածքային ամբողջականությունը Հայաստանը պատրաստ է ճանաչել: Եվ մեր ընկալմամբ՝ Ադրբեջանը պատրաստ է ճանաչել ՀՀ 29.800 քառ. կմ տարածքային ամբողջականությունը: Եթե մենք այս հարցում Ադրբեջանի հետ ճիշտ ենք հասկանում իրար, Հայաստանն, այո՛, ճանաչում է Ադրբեջանի 86.6 հազար քառ. կմ տարածքային ամբողջականությունը՝ այն ըմբռնմամբ, որ Ադրբեջանը ճանաչում է Հայաստանի 29.800 քառ. կմ տարածքը»,-ասաց Փաշինյանը:
ՀՀ վարչապետը նաև շեշտեց՝ ԼՂ հայության իրավունքների և անվտանգության հարցը պետք է քննարկվի Ստեփանակերտ-Բաքու երկխոսության ֆորմատում:
«Նկատի ունենք, օրինակ, որ կարող է Լեռնային Ղարաբաղի հայության իրավունքների և անվտանգության հարցն ուղղակի մոռացության մատնվել, և Ադրբեջանը շարունակի ուժային լծակի գործադրմամբ Լեռնային Ղարաբաղի հայության էթնիկ զտման և ցեղասպանության քաղաքականությունը»,-ասաց Փաշինյանը։
Անդրադառնալով անկլավների հարցին՝ ՀՀ վարչապետը նկատեց՝ այս թեմայի հետ կապված՝ տարբերակները մի քանիսն են։
«Եթե այդպիսի համաձայնություն ձեռք բերվի, դրանցից մեկը կարող է լինել, որ գծի երկու կողմում գտնվող անկլավային տարածքները մնում են այն կողմի վերահսկողության ներքո, որում գտնվում են՝ տարածքների, այսպես ասած, համաչափության կամ նույնականացման ձևով, այսինքն՝ կիլոմետր քառակուսիների ճշգրտումով։ Ենթադրենք՝ չափել՝ Արծվաշենի տարածքն ինչքան է, մյուսների տարածքն ինչքան է և, ըստ այդմ, այնպես անել, որ ամեն ինչ լինի հավասարության սկզբունքի հիման վրա։
Կամ մյուս տարբերակն այն է, որ խաղաղության պայմանագրի ստորագրումից Արծվաշենը, համապատասխանաբար, վերադառնա Հայաստանի ինքնիշխանության ներքո, էն մյուս տարածքները, որոնք դե յուրե կհիմնավորվեն, վերադառնան ․․․ որովհետև այս նրբությունը միշտ պետք է հաշվի առնել, որովհետև այդ իրավական մասերը մինչև վերջ ուսումնասիրված չեն»,- ասաց Նիկոլ Փաշինյանը՝ շեշտելով, որ սա քաղաքական դիրքորոշում է, իրավական մասերը մինչև վերջ ուսումնասիրված չեն։
