Նիկոլ Փաշինյանի առաջարկները ոչ միայն իրատեսական չեն, այլև լրջագույն խնդիրներ են պարունակում ինչպես ՀՀ օրենսդրության, այպես էլ միջազգային օրենքների տեսանկյունից, Azg.am-ի թղթակցի հետ զրույցում ասաց քաղաքագետ Արմեն Բաղդասարյանը՝ անդրադառնալով Փաշինյանի՝ երեկ հնչեցրած այն հայտարարությանը, որ Հայաստանն Ադրբեջանին առաջարկել է սպառազինությունների փոխադարձ վերահսկման մեխանիզմ, նաև չհարձակման մասին պայմանագրի ստորագրում։
«Խոսքն առաջին հերթին սպառազինությունների վերահսկման մասին է։ Նախևառաջ աբսուրդ է, երբ ՀԱՊԿ անդամ երկիրը՝ այս դեպքում Հայաստանը, ՆԱՏՕ-ի բլոկի դաշնակից Ադրբեջանին պետք է արտոնի վերահսկել իր սպառազինությունը՝ այսինքն՝ ՀԱՊԿ անդամ երկրի սպառազինությունը։ Այստեղ շատ լուրջ խնդիր կա։
Արգելք կա նաև ներքին օրենսդության տեսանկյունից, որովհետև մեր սպառազինության վերաբերյալ գրեթե բոլոր տեղեկությունները ռազմական և պետական գաղտնիք են համարվում։ Իսկ մենք Պետական գաղտնիքի մասին օրենք, որտեղ յուրաքանչյուր դետալ մանրամասն նշված է, և հիմա, փաստորեն, ՀՀ վարաչապետը, շրջանցելով այդ օրենքը, մտադիր է Ադրբեջանին թույլ տալ, որպեսզի վերջինս գա և վերահսկի մեր սպառազինությունը։ Սա ուղղակի աբսուրդ է»,- ասաց Արմեն Բաղդասարյանը։
Քաղաքագետի համոզմամբ՝ Ադրբեջանը, մեծ հավանականությամբ, կօգտվի Նիկոլ Փաշինյանի առաջարկից, սակայն հայկական կողմին նույն իրավունքը չի տա, հետևաբար այստեղ քննարկելու հարց անգամ չկա։
«Ինչ վերաբերում է չհարձակման մասին պայմանագրի ստորագրմանը, կարծում եմ՝ անիմաստ է, քանի դեռ ընդհանուր համաձայնագիրը չկա, և ամենակարևորը՝ չկա սահմանազատման գործընթաց։ Որովհետև, եթե սահմանը հստակ չէ, Ադրբեջանն ամեն անգամ կարող է ասել՝ «Ես հարձակվելու եմ, բայց որտե՞ղ է ֆիքսված, որ դա ՀՀ տարածքն է, որտե՞ղ է ֆիքսված, որ Ադրբեջանը ՀՀ տարածքի վրա է հարձակվել»։
Չհարձակման մասին պայմանագիրը հնարավոր կլինի միայն սահմանազատման աշխատանքների ավարտից հետո, երբ այդ սահմանը փոխադարձաբար ճանաչելի կլինի։ Հակառակ դեպքում գործընթացը պարզապես անիմաստ է»,- նշեց մեր զրուցակիցը։
Արմեն Բաղդասարյանը շեշտեց՝ սահմանազատման և սահմանների հստակեցման աշխատանքները պետք է զուգահեռաբար կատարվի և խաղաղության համաձայնագրում անպայմանորեն ֆիքսվի։
Հիշեցնենք, որ հայկական բանակի կազմավորման 32-րդ տարեդարձին նվիրված տոնական միջոցառմանը Նիկոլ Փաշինյանը հայտարարել էր՝ Հայաստանը սահմանի դեմիլիտարիզացիա, այսինքն՝ ապառազմականացում է առաջարկել Ադրբեջանին: Նաև սպառազինությունների փոխադարձ վերահսկման մեխանիզմ, նաև չհարձակման մասին պայմանագրի ստորագրում, եթե կպարզվի, որ խաղաղության պայմանագրի ստորագումը սպասվածից ավելի երկար ժամանակ է պահանջելու:
Հայաստանի Հանրապետությունը հավատարիմ է խաղաղության օրակարգին և չի շեղվելու այդ օրակարգից»։
