Խաղաղության պայմանագիր կնքելու հայտարարությունները հայկական կողմից արվում են ընդամենը քարոզչական նպատականերով՝ միջազգային հանրությանը ցույց տալու, որ Հայաստանը հավատարիմ է խաղաղ գործընթացին։ Իրականում Նիկոլ Փաշինյանը շատ լավ գիտի, որ խաղաղության պայմանագիր չի լինելու։ Azg.am-ի թղթակցի հետ զրույցում նման համոզմունք հայտնեց քաղաքագետ Արմեն Բաղդասարյանը՝ հակադրելով Փաշինյանի՝ խաղաղության պայմանագրի վերաբերյալ հավաստիացումները և Ալիևի՝ օրեր առաջ Թալիշից հնչեցրած խոսքերը, որ Հայաստանը պետք է խաղաղության պայմանագիր կնքի Ադրբեջանի թելադրած պայմաններով։
Ըստ մեր զրուցակցի՝ խաղաղության պայմանագիր չի լինելու, որովհետև Ադրբեջանի առաջարկած պայմանները գործնականում նշանակելու են ոչ թե խաղաղություն, այլ Ադրբեջանի կողմից հրահրվող հաջորդ պատերազմի լեգիտիմ հիմք։
«Այսինքն՝ կարող է նույնիսկ ինչ-որ փաստաթուղթ լինել, որի անունը կլինի խաղաղության պայմանագիր, բայց դա փաստացի լինելու է հաջորդ պատերազմի հիմքը։ Հետևաբար այդ փաստաթուղթը չի կարելի խաղաղության պայմանագիր անվանել։
Ադրբեջանին էլ հենց դա է պետք։ Ինչո՞ւ է նա անընդհատ մեծացնում ճնշումները և ագրեսիվ հռետորաբանությունը. որպեսզի ոչ թե Հայաստանին ստիպի ստորագրել այդ փաստաթուղթը, այլ ստիպի չստորագրել այն։ Այդպիսով Հայաստանը միջազգային հանրությանը կներկայանա որպես խաղաղության օրակարգին խոչընդոտող կողմ, այսինքն՝ Ադրբեջանը խոչընդոտողի դերը հաջողությամբ կփոխանցի Հայաստանին»,- ասաց քաղաքագետը։։
Արմեն Բաղդասարյանի խոսքով՝ գլոբալ առումով Ադրբեջանն ագրեսիա է նախապատրաստում ոչ թե Արցախի, այլ Հայաստանի նկատմամբ, այդ պատճառով էլ խաղաղության օրակարգ է բերում այսպես կոչված ադրբեջանցի փախստականների վերադարձի հարցը Սյունիք, Սևանի ավազան և Արարատյան դաշտ։
«Եթե նման բան լինի, Ադրբեջանին, իր կարծիքով, իրավունք կտան իբր իրենց բնակիչների անվտանգությունն ապահովելու նպատակով զորքեր մտցնել ՀՀ տարածք։
Այսպիսով, Ադրբեջանի խնդիրն Արցախը չէ. Ադրբեջանը համարում է, որ այդ հարցը վերջնականապես լուծել է, և 2.5 տարի հետ, երբ ռուս խաղաղապահները դուրս գան Արցախից, ինտեգրացիայի անվան տակ ուղղակի էթնիկ զտումներ կիրականացնեն և կհայաթափեն Արցախը։ Սա ադրբեջանական կողմի պատկերացումն է։
Այսինքն՝ այս պահին իրենց թիրախը միայն Արցախը չէ, դա նրանց ծրագրի մինիմումն է։ Ադրբեջանի բուն թիրախը Հայաստանի Հանրապետությունն է»,- ամփոփեց մեր զրուցակիցը։
