Բագրատ Սրբազանն այսօր լրագրողների հետ զրույցում անդրադարձավ այն հարցին, թե ինչու հանդիպում չի ունեցել ՀՀ առաջին նախագահ Լևոն Տեր-Պետրոսյանի հետ։
Նա նշեց, որ չհանդիպելու պատճառի մասին չի կարող բարձրաձայնել։
«Ո՛չ մերժում, ո՛չ էլ որևէ բան չկա։ Զուտ հանգամանքներով պայմանավորված։ Լևոն Զուրաբյանի հետ եմ խոսել և նախագահի գրասենյակի ղեկավարի հետ։ Անձնական հարաբերությունները շատ նորմալ են, որևէ խնդիր չկա, ուղղակի կան հարգելի պատճառներ։
ՀԱԿ-ի տղաների հետ հանդիպել ենք, տարբեր մոտեցումներ են եղել. որոշ հարցերի շուրջ համաձայնել ենք, որոշների հետ չենք համաձայնել»,-ասաց նա։
Հարցին՝ իսկ ի՞նչ են քննարկել Ռոբերտ Քոչարյանի և Սերժ Սարգսյանի հետ հանդիպումների ժամանակ, Սրբազանը պատասխանեց, որ հանդիպումը փակ է եղել, և մանրամասներ ասել չի կարող։
«Մեր երկրում գոյություն ունեն քաղաքական ուժեր՝ ներառյալ նախկին նախագահները։ Մենք առաջին իսկ պահից ասել ենք, որ սա բոլորի շարժումն է՝ ո՛չ ընդդիմության, ո՛չ որևէ կուսակցության, և սա նաև չակընկալիքների պայքար է:
«Մենք այդ սկզբունքը պահել ենք, եթե տեսնում եք՝ շարժման մեջ տարբեր գաղափարական կողմնորոշման, երբեմն հակադրությունների մեջ գտնվող ուժեր կան: Ինչպես շարժման ժամանակ հանդիպել եմ երրորդ նախագահ Սերժ Սարգսյանին, այնպես էլ մեր համակարգող խորհրդի հետ համախորհուրդ, պայքարի այս ընթացքը շարունակելու համար որոշել ենք քաղաքական դաշտի բոլոր գործողների հետ հանդիպել՝ անխտիր»,- ասաց նա:
Սրբազանը միաժամանակ շեշտեց՝ իրենց աջակցելու կամ չաջակցելու հարց չկա:
«Առաջին իսկ օրից ես ասել եմ, որ եթե նույնիսկ ես մենակ լինեմ, այս պայքարը պետք է շարունակվի, որովհետև սա ինձ համար նաև իմ կենսագրության մասին է»:
Հարցին՝ նախկին նախագահներն իր հետ հանդիպման ժամանակ հայտարարել են, որ աջակցո՞ւմ են շարժմանը, նա արձագանքեց.
«Քանի որ հանդիպումը փակ է եղել, ես իրավասու չեմ մանրամասների մասին խոսելու: Խնդիրը աջակցել-չաջակցելը չէ, խնդիրն այն է, որ իմ պարտքն է բոլորին ներկայացնել, թե մենք ուր ենք գնում: Մեր երկրում բազմաշերտ քաղաքական դաշտ գոյություն ունի՝ ներառյալ նախկին նախագահները, և մեր խորհուրդի որոշումն էր պայքարի ճանապարհին հստակ ներկայացնել թե ինչ քայլերով ենք առաջ գնալու»։
