Ռուբեն Վարդանյանի ակնարկները շատ հասկանալի և տրամաբանական էին, սակայն Արցախի շրջափակումը շատ քիչ է հետաքրքում Արևմուտքին. քաղաքագետ

97

Քաղաքագետ Երվանդ Բոզոյանը դրական է գնահատում ԱՀ պետնախարար Ռուբեն Վարդանյանի՝ BBC Hard Talk-ին տված հարցազրույցը։

«Հարցադրումներից պարզ երևում էր, որ բրիտանացի լրագրողը բավականին լավ տեղյակ էր Արցախի և Հայաստանի իշխանությունների միջև հարաբերություններից, և հրաշալի գիտեր, թե ինչ դիրքորոշում ունի ՀՀ այսօրվա ղեկավարությունն Արցախի կարգավիճակի առնչությամբ։ Սա խիստ վիրավորական է հայ հասարակության համար։

Հստակ հասկանալով, որ Հայաստանի իշխանությունը ձեռքերը լվացել է Արցախից՝ հաղորդման հեղինակը Ռուբեն Վարդանյանին հարցնում է՝ ո՞րն է այդ դեպքում նրա հույսը։ BBC-ի լրագրողն այս կերպ փորձեց ծանր դրության մեջ գցել ԱՀ պետնախարարին, բայց, ի պատիվ իրեն, վերջինս կարողացավ «դուրս գալ» հարցադրումների տակից»,- նշեց Երվանդ Բոզոյանը։

Քաղաքագետը նկատեց՝ Արցախի նկատմամբ ՀՀ իշխանությունների խայտառակ դիրքորոշումն արդեն իսկ արձանագրվել է Արևմուտքում, և սա, ըստ քաղաքագետի, խիստ բացասական է ազդելու ինչպես Արցախի, այնպես էլ Հայաստանի ապագայի վրա։

Վերադառնալով ԱՀ պետնախարարի բուն հարցազրույցին՝ մեր զրուցակիցը շեշտեց՝ Ռուբեն Վարդանյանի ակնարկները շատ հասկանալի և տրամաբանական էին, սակայն Արցախի շրջափակումը շատ քիչ է հետաքրքում Արևմուտքին։

«Արևմուտքին ընդամնեը հետաքրքրում է՝ ԼՂ հակամարտության արդյունքում Ռուսաստանի ազդեցությունը կուժեղանա՞, թե կթուլանա։ Արևմուտքը, ողջ ուշադրությունը սևեռելով ուկրաինական խնդրի վրա, մոռացել է մյուս բոլոր տարածաշրջանների հետ կապված խնդիրները, և հումանիտար, բարոյական, մարդու իրավունքների սկզբուքնները երկրորդ պլան են մղվել»,- ասաց քաղաքագետը։