Շատ ավելի ճիշտ կլիներ, որ քննարկվեր ոչ թե Հանրային ռադիոյի տնօրեն Գարեգին Խումարյանի արարքը, այլ քննարկման առարկա դառնային նրա բարձրացրած հարցերը, որովհետև նրա բարձրացրած հարցերն իրականում շատ կարևոր են՝ այսօր մեր հասարակությանը հուզող ամենակարևոր հարցերը։ Azg.am-ի թղթակցի հետ զրույցում այս մասին ասաց քաղաքագետ Արմեն Բաղդասարյանը՝ անդրադառնալով Նիկոլ Փաշինյանի՝ «Անվտանգային միջավայր» հաղորդաշարին տված հարցազրույցից հետո Հանրային ռադիոյի տնօրեն Գարեգին Խումարյանի հրապարակային անդրադարձին և ԱԺ փոխնախագահ Հակոբ Արշակյանի ֆեյսբուքյան հակադարձող գրառմանը։
«Կարծում եմ՝ ավելի ճիշտ կլիներ, եթե բովանդակային քննարկումներ ծավալվեին և ոչ թե կոնկրետ մարդու արարք քննարկվեր։ Սա կարող էր շատ լավ առիթ լինել, որպեսզի խնդրահարույց հարցերը ևս մեկ անգամ քննարկվեին։
Վստահ եմ՝ իշխանության ներսում բազմաթիվ մարդիկ կան, որոնք ճիշտ նույն կերպ համաձայն չեն իշխանությունների վարած քաղաքականության հետ, բայց ձայն չեն հանում։ Գուցե սա առիթ լինի, որպեսզի շատերը հետևեն Գարեգին Խումարյանի օրինակին, եթե, իհարկե, այդպիսի մարդիկ իսկապես կան»,- ասաց Արմեն Բաղդասարյանը։
Անդրադառնալով փաստին, որ վարչապետ Նիկոլ Փաշինյանի՝ Հանրային ռադիո հարցազրույցի գնալուց առաջ Արցախի դրոշը շենքի դիմացից հեռացվել է, քաղաքագետը նկատեց՝ բոլոր այդ հարցերը պետք է կարգավորվեն օրենքով։
«Ե՛վ հիմա, և՛ 2018 թվականին նմանօրինակ հարցերը պետք է կարգավորվեին օրենքով, ոչ թե ինչ-որ հասկացություններով կամ էմոցիաներով, որովհետև եթե գաղափարների տակ քողարկված քայլերն օրենքից վեր են դասվում, արդյունքում ունենում ենք այն, ինչ ունենում ենք։
Եթե մենք պետություն ենք, ուրեմն պետության մեջ պետք է գործեն օրենքները։ Եթե օերնքով այդտեղ նախատեսված է Արցախի դրոշ, ուրեմն որևէ մեկը չպետք է իրավունք ունենար հանել այն։ Իսկ եթե արգելված է՝ որևէ մեկը չպետք է իրավունքն ունենար Արցախի դրոշը կանգնեցնել։
Ուրիշ բան, եթե որևէ մեկն այդ օրենքին դեմ է. պետք է դուրս գալ և պայքարել այդ օրենքի համար։ Եթե մենք 2018-ին էլ ամեն ինչում առաջնորդվեինք օրենքով, այսօր գուցե այլ իշխանություն կուեննայինք և ուրիշ երկրում կապրեինք»,-շեշտեց մեր զրուցակիցը։
Վերջում Արմեն Բաղադասարյանը հավելեց՝ շատ կզարմանա, եթե հայտնի գրառումից հետո Հանրային ռադիոյի տնօերնին չհեռացնեն աշխատանքից։
«Շատ զարմանալի է, որ մինչև հիմա հանդուրժում էին Գարգին Խումարյանի պաշտոնավարումը, որովհետև, ինչպես ես եմ հետևել, Հանրային ռադիոն շատ հարցերում իշխանությնա վարած քաղաքականությանը դեմ էր արտահայտվում։
Այժմ չեմ զարմանա, որ նրան աշխատանքից հեռացնեն, բայց կզարմանամ, եթե նրա հետ բազմաթիվ աշխատակիցներ հեռանան։ Վստահ եմ, որ Հանրային ռադիոյի շատ աշխատակիցներ մտածում են այնպես, ինչպես Գարգեին Խումարյանը, բայց համարձակություն չունեն նրա հետ հեռանալու»,- ամփոփեց մեր զրուցակիցը։
Հիշեցնենք, որ Հայաստանի հանրային ռադիոյի գործադիր տնօրեն Գարեգին Խումարյանը երեկ անդրադարձել էր վարչապետ Նիկոլ Փաշինյանի՝ «Անվտանգային միջավայր» հաղորդաշարին տված հարցազրույցին։ Նա ներողություն էր խնդրել ունկնդիրներից։
«Հանրային ռադիոյի այս տաղավարում հունվարի 31-ին տեղի ունեցածը լավ ժուռնալիստիկա չէր։ Ներողություն եմ խնդրում Հանրային ռադիոյի այն ունկնդիրներից, ում սպասելիքները չարդարացրինք։ Վարչապետի հետ մեր հարցազրույցն անկասկած շատ ավելի լավը կարող էր լինել։
Հիմա բուն տեղի ունեցածի մասին։
Հունվարի 31-ին այս տաղավարում ծավալված ու մեր ռադիոլսողներից շատերի մոտ հարցեր առաջացրած խոսույթը քաղաքական չէր։ Այն «խորհուրդ խորին»-ի շուրջ էր՝ մեր երկրի գոյաբանական իմաստների ու մեր ինքնության շուրջ։
Այն ծավալվել է իմ ղեկավարած լրատվամիջոցում, և որպես տան տեր պիտի մի երկու բառ էլ ես ասեմ։
Անցած շաբաթ այս տաղավարում մեզ առաջարկվել է դադարել լինել այն, ինչ ենք։ Մեզ ասվել է՝ թուրքերն ուժեղ են, հայերը՝ թույլ։ Թուրքերը կոտորում են հայերին։ Այս սիլլոգիզմը պիտի որ ավարտվեր «եկեք ուժեղանանք» դեդուկտիվ եզրահանգմամբ, բայց փոխարենը հնչեց «եկեք դադարենք հայ լինել»-ը»-գրել էր Խումարյանը։
ԱԺ փոխնախագահ Հակոբ Արշակյանը ֆեյսբուքյան էջում իր հերթին հակադարձել էր, որ Հանրային ռադիոյի տան տերը հանրությունն է, ռադիոյի տնօրենն ընդամենը ռադիոյի տնօրենն է։
