«Փաշինյանը կոչ արեց դադարեցնել կորսված հայրենիքի որոնումները»
Ապրիլի 24-ին ռուսական «Ինտերֆաքս» գործակալությունն այսպիսի վերնագրով հրապարակմամբ է հանդես եկել՝ արձագանքելով Հայոց ցեղասպանության զոհերի հիշատակի օրվա առթիվ ՀՀ վարչապետ Նիկոլ Փաշինյանի հայտարարություններին: Անդրադարձ է կատարվել մասնավորապես նրա այն հայտարարությանը, թե մեծամասշտաբ ողբերգությունը տեղի է ունեցել Առաջին համաշխարհային պատերազմի ժամանակ, ինչը, մեր կողմից նկատենք, ասում են թուրքերը, երբ ուզում են արդարացնել իրենց՝ ժխտելով ցեղասպանության իրողությունը: Հոդվածում զուգահեռաբար բերվում է հիշատակի օրվա նախօրեին Թուրքիայի նախագահ Էրդողանի ասած այն խոսքը, թե Հարավային Կովկասում նոր կարգ է հաստատվում, եկել է ժամանակը ներկա իրողություններով գործելու եւ մի կողմ գցելու «անհիմն հիշողությունները»:
Փաշինյանը, նկատում է հրատարակությունը, դարձավ Հայաստանի առաջին ղեկավարը, որը «ցեղասպանություն» եզրույթի կողքին գործածեց «մեծ եղեռն» արտահայտությունը:
Լրատվամիջոցները բերում են Հայաստանի նախկին նախագահ Սերժ Սարգսյանի հայտարարությունը՝ այսօր էլ պատերազմի սպառնալիքով եւ զանազան ճնշումներով Հայաստանի ու հայ ժողովրդի հաշվին հնարավորինս շուտ իրենց ուզածը ստանալու Թուրքիայի եւ Ադրբեջանի ձգտումների մասին: Ինչպես եւ այն մասին, որ անօրինական կերպով ճանաչելով Արցախն Ադրբեջանի մաս, Հայաստանը կառավարողներն այժմ փորձում են մոռացության մատնել Հայոց ցեղասպանությունը, պատմական արդարության եւ սեփական իրավունքների վերականգնման համար հայ ժողովրդի պայքարը բնորոշելով իբրեւ պետությանը սպառնալիք:
«Կալենդար սոբիտի» («Իրադարձությունների օրացույց») կայքը, իր ընթերցողներին տեղեկացնելով Օսմանյան Թուրքիայում հայերի 1915 թվականին սկսված եւ տարիներ շարունակված զանգվածային ջարդերի մասին` նշում է, որ ցեղասպանությունը կազմակերպվել էր Թուրքիայի կառավարողների կողմից, կայսերական Գերմանիայի աջակցությամբ եւ արեւմտյան երկրների թողտվությամբ: Դավանելով հետադեմ պանթուրքիզմի եւ պանիսլամիզմի գաղափարները, ավելացնում է հրատարակությունը, թուրքական իշխանությունները ձգտում էին ոչ միայն պահպանել Օսմանյան կայսրությունն ու բռնի կերպով ոչնչացնել կամ ձուլել հպատակ բնակչությանը, այլեւ ստեղծել համաթուրանական կայսրություն, որը կներառի բոլոր մահմեդականներին:
«ՌԻԱ նովոստի» գործակալությունը, վկայակոչելով Երեւանում Ռուսաստանի դեսպանության սգակցական գրառումը օրվա առթիվ, հիշատակում է նաեւ 1915-1922 թվականներին իր պատմական հայրենիքում՝ Արեւմտյան Հայաստանում հայ ժողովրդի ցեղասպանության դատապարտման մասին ՌԴ Պետդումայի 1995 թվականի հայտարարությունը:
«Պառլամենտսկայա գազետա»-ն էլ փաստում է, որ մի քանի տարի շարունակված ցեղասպանության զոհերի թիվն ըստ տաբեր աղբյուրների գնահատվում է 200 հազարից մինչեւ 2 մլն, իսկ 800 հազարն էլ դարձել են գաղթական: Ինչպես եւ հիշեցվում է, որ 2015 թվականին Եվրոպական խորհրդարանն ապրիլի 24-ը հայտարարել է Օսմանյան Թուրքիայում 2015 թվականի Հայոց ցեղասպանության զոհերի հիշատակի օր:(*)
ՌԴ Լիպեցկի մարզի «Վեստի Լիպեցկ» կայքն անդրադարձել է տեղի հայերի կազմակերպած հիշատակի հանդիսությանը:
Ցեղասպանության զոհերի հիշատակի օրվա առթիվ հայ ժողովրդին է դիմել Աբխազիայի նախագահ Ասլան Բժանիան: Նա, «Սպուտնիկ Աբխազիա»-ի տեղեկացմամբ, նաեւ գնահատելով ցեղասպանությունից փրկված ու իր երկրում ապաստան գտած հայերի սերունդների ավանդը երկրի զարգացման գործում, մեր ժողովրդին մաղթել է ոգու ամրություն, խաղաղություն եւ բարգավաճում:
ԳԵՂԱՄ ՄԿՐՏՉՅԱՆ
*) Սխալ է ռուսական թերթի այս պնդումը. Ապրիլի 24-ը որպես սգո խորհրդանշական օր հայրապետական հատուկ կոնդակով սահմանել է Ամենայն հայոց հայրապետ Գեւորգ Ե Սուրենյանցը, նկատի ունենալով արեւմտահայ մտավորականության ձերբակալության թվականը: Խմբ.:
