Ունենք մոնումենտալ ընդդիմութուն, որը կորցրել է լայն հասարակության, անգամ իր ընտրազանգվածի հետ կապը. տեսակետը «Այլընտրանքային նախագծեր խմբի» համահիմնադիր Վահե Հովհաննիսյանն է:
«Հայկական օրակարգ. շարունակություն` հանրահավաքներից հետո» թեմայով պանելային քննարկման ժամանակ փորձագետը կարծիք հայտնեց՝ ընդդիմությանը նոր դեմքեր ու մասնակիցներ են պետք, ինչի համար հարկավոր է ընդլայնել ինտեգրացիոն հնարավորությունները:
«Մարդիկ պետք է կարողանան ինտեգրվելու հնարավորություն ունենալ։ Այդ ժամանակ յուրաքանչյուրը կկարողանա իր ներդրումն ունենալ: Ինչը հնարավորություն կտա ձևավորել իշխանությանը այլընտրանքային ընդդիմություն: Հայաստանում պատերազմից ու բոլոր տեսակի աղետներից հետո դասական ընդդիմությունն իսպառ վերացել է»,- փաստեց քաղաքագետը։
Հայաստան պետությունը հիմա նստած է վառոդի տակառի վրա, որն ամեն օր կարող է պայթել: Ե՞րբ ու ինչպե՞ս կպայթի այդ տակառը. որևէ մեկն ասել չի կարող: Սակայն փաստն այն է, որ առկա պրոբլեմները չեն լուծվում, մինչդեռ ձեռքերը ծալած նստելու, հանգստանալու որևէ իրավունք չունենք. համոզված է Հովհաննիսյանը:
Հայկական գործոնի բացակայությունը՝ պետությունը իջել է «հայկական տարածքներ» ձևակերպման մակարդակի: Հենց սա է պատճառը, որ շարունակ տարածքներ ենք կորցնում:
«Մեզ պետք է հայկական գործոն։ Շատ լավ կլիներ, որ դրա բարձրացման գործում ազդեցություն ունենար իշխանությունը, բայց դրա համար պետք է փոխված լիներ իշխանությունը: Օրվա իշխանությունը զբաղված չէ հայկական գործոնի ձևավորմամբ: Իշխանություն, որ կազմված է մեկ մարդուց, իսկ պետական ինստիտուտները կազմաքանդված են»,- վստահեցնում է փորձագետը։
Վահե Հովհաննիսյանի խոսքով՝ Հայաստանն այժմ գտնվում է տրամաբանական զարգացումների ու վատ անակնկալների խաչմերուկում: Մեջքը շտկելու և պետականություն ունենալու համար նա համախմբման կոչ արեց:
Ավելին՝ տեսանյութում:
