Մարտունեցին չի փոշմանի, եթե Արման Թաթոյանին ընտրի. մարտունեցի կին

Մենք վերջերս հրապարակեցինք, որ Մարտունիում համայնքապետարանի աշխատողները, պաշտոնատար անձինք սպառնում են մանկապարտեզների և դպրոցների տնօրեններին, «ռազբորկեք» են անում, մարդկանց կանչում են, որ հասկանան՝ որտեղից այդ ձայնագրությունները։ Մենք տնօրեններին ասում ենք՝ Արման Թաթոյանի վարչապետության ժամանակ նրանք լինելու են պաշտպանության ներքո, նրանց ոչ ոք չի ճնշելու, այսօր Մարտունիում քարոզարշավի ժամանակ հայտարարեց «Միասնության թևեր» կուսակցության առաջնորդ Արման Թաթոյանը։

«Մեր ուսանողներին, ուսուցիչներին ոչ ոք չի ճնշելու։ Նրանք իմ պաշտպանության տակ են լինելու։ Տեսեք՝ այսօր ինչ է ստացվել. լավ ուսուցիչ է նա, ով ոչ թե լավ գիտելիք է տալիս, այլ նա, ով ընդդիմության կամ իշխանության հետ է։ Լավ ուսուցիչը նա է, ով լավ գիտելիք է տալիս, լավ ուսուցիչն այն է, ով արժեքներ է փոխանցում։

Տեսեք՝ ինչքան շատ է տարածված իշխանության կողմից մարդկանց վախեցնելը. Ասում են՝ տե՛ս, աղջիկդ էսինչ տեղում է աշխատում, տղադ էնինչ տեղում է աշխատում։ Բայց չվախենաք, ես ձեր մեջքին կանգնած եմ, միայն խնդրում եմ՝ քվեարկություն կատարեք հանուն մեր երկրի ապագայի։ Ես ձեզ ոչ մի բանով չեմ վախեցնում, ես լուծումներ եմ տալիս»,- ասաց Արման Թաթոյանը։

Նա հավաքված մարտունեցիներին հիշեցրեց՝ քվեախցիկում ամեն բան գաղտնի է, և ոչ ոք չի կարողանալու իմանալ՝ ում օգտին է քաղաքացին քվեարկել։

«Ես հրաշքներ խոսք չեմ տալիս, բայց խոսք եմ տալիս ազնիվ, արդար աշխատանք, որ երբեք չփոշմանեք, որ ինձ ձայն եք տվել»,- ասաց նա։

Այնուհետև Արման Թաթոյանը մտավ բնակիչների բնակարաններ։ Մի տարեց կին, տեսնելով նրան, հայտարարեց՝ մարտունեցին չի փոշմանի, եթե ընտրի նրան։
Այնուհետ Արման Թաթոյանը շեշտեց՝ ժողովուրդը զորեղ է և հենց ժողովուրդըտ պետք է ընտրի՝ ով է լինելու հաջորդ վարչապետը։

«Երբ ունենանք ուրիշ պետության կողմից նախընտրելի ղեկավար, քաշելու են իրենց կողմ։ Այս ընտրությունները ոչ թե օտար, այլ մեր շահերի համար են։ Ես պարտավորվում եմ լինել ՀՀ իրավունքների պաշտպանը, որ Հայաստանը միշտ և ամեն տեղ պատասխան տվող ունենա։

ՀՀ այսօրվա ղեկավարն ասում է՝ եթե ինքը չլինի հաջորդ վարչապետ՝ պատերազմ կլինի։ Բայց վախեցնում են, ժողովուրդ ջան։ Մեզ պետք է իշխանություն, որը համակարգ է ստեղծում, ոչ թե սպառնում է սեփական ժողովրդին պատերազմով»,- ասաց Թաթոյանը։