Խորամանկ կերպար խաղալիս մի հոնքը վերև, շուրթերը լայն ձգած, աչքերը՝ սևեռուն, կամ բիբերը ոլորած։
Գոռոզ, ինքնահավան կերպարներում՝ կզակը բարձր, հոնքերը՝ նույնպես, արծվաքիթը՝ ցցած, կեցվածքը՝ ձիգ։
Քծնող շողոքորթի կերպարում՝ մեջքը ծռած, շուրթերը՝ կախ, ժպիտը՝ ծուռ, հայացքը՝ խոնարհ։
Ռաֆայել Քոթանջյան…
Հայկական կինոյում նա գլխավոր, առանցքային կերպարներ չստեղծեց։ Անշուշտ, կստեղծեր, տաղանդ էլ ուներ, աշխատասիրություն էլ, բայց նա այդպես էլ չգտավ իր ռեժիսորին ու սցենարիստին։ Ռեժիսորները նրա համար փոքր դերեր էին առանձնացրել, բայց այնպիսիք, որ միայն Ռաֆայել Քոթանջյանը կարող էր խաղալ, դրանց գույն ու համ տալ՝ ինքնատիպ, բնավորությունն ու էությունը, խառնվածքն ու կերպն ընդծող արտահայտչամիջոցներով։ Ու թվում էր՝ նա չի խաղաղում, այդ կերպարները նրա էությունն են։
Էլեգանտ, նրբաճաշակ հագուկապով, մտավորականի դասական կերպարով, միշտ լայնեզր գլխարկով ու մաքրամաքուր հայերենով. նա մագնիսի պես իրեն էր ձգում շրջապատին։ Ոչ մեկին թթու խոսք չէր ասի, բոլորից գոհ էր, բոլորի հետ սիրալիր ու հարգալից։
Ռուսական, ուկրաինական ֆիլմերում նա ավելի շատ է խաղացել, քան հայկական կինոյում։
Որդին՝ Մայքլ Քոթանջյանը, հիշում է, որ 1990-ականներին հայրը մեկնում էր արտասահման ու իրար հետևից նկարահանվում 20-25 ֆիլմերում։ Հայրը նրա համար աշխարհի ամենալավատես ու անչար մարդն է, որը սիրում էր կրկնել՝ լավ ասենք, որ լավ լինի։
Փոքր, էպիզոդիկ դերերն անգամ նա խաղացել է բարձր պրոֆեսիոնալիզմով՝ դրանք ուղղակիորեն մեխելով մարդկանց մտապատկերում ու հիշողության մեջ։
Ռաֆայել Քոթանջյանը թատրոնում նույնպես խաղացել է, հիշարժան դերեր կերտել, նաև տարբեր ֆիլմերում դերեր է կրկնօրինակել, հնչյունավորել։
Նրա խաղացած դերերի մի մասը չկա, չի պահպանվել, որովհետև թատերական ներկայացումները կամ չեն տեսագրվել, կամ տեսագրությունները կորել են, ոչնչացվել են նաև նրա հնչյունավորած որոշ ֆիլմեր, որոնք, հիրավի, պրոֆեիսոնալ, անկրկնելի գործեր են։
Հունիսի 13-ը Ռաֆայել Քոթանջյանի մահվան տարելիցն է։ Արտիստը վախճանվեց մեկ տարի առաջ, 79 տարեկանում։
Նրա մահով մեր քաղաքում մի գույն էլ պակասեց, ազնվազարմ, զտարյուն մտավորականի մի կերպարով էլ պակասեցինք։
Քաղաքային պանթեոնում բացվեց Ռաֆայել Քոթանջյանի հուշարձանը։
Քանդակի հեղինակը Զամոկ Սարգսյանն է։
