Իրավապաշտպան Ժաննա Ալեքսանյանի գնահատմամբ՝ ՀՀ մարդու իրավունքների պաշտպանը պետք է անհապաղ արձագանքի Արցախի նախկին պետնախարար Ռուբեն Վարդանյանի ուղերձին՝ դիտարկելու հայ բանտարկյալների հարազատների՝ Բաքու այցելության հնարավորությունը։
«Նախ Ռուբեն Վարդանյանի ուղերձում շատ կարևոր դրվագ կար. որ նա հանդիպել է Ադրբեջանի օմբուդսմենի հետ։ Մենք գիտենք, թե այդ երկրում ինչ ռեժիմ է գործում, և շատ լավ հասկանում ենք, որ Ադրբեջանի մարդու իրավունքների պաշտպանը չէր կարող հենց այնպես հանդիպել Ռուբեն Վարդանյանի հետ։ Նա առնվազն պետք է Ալիևի թույլտվությունն ունենար, որից հետո էլ խոսակցություն կզարգանար և Ռուբեն Վարդանյանը նման ուղերձով հանդես կգար։ Չնայած այնպես չէ, որ մեզ մոտ ամեն ինչ Նիկոլ Փաշինյանը չի որոշում։ Մեզ մոտ էլ է այդ վիճակը»,- Azg.am-ի թղթակցի հետ զրույցում ասաց իրավապաշտպանը։
Ըստ Ժաննա Ալեքսանյանի՝ Փաշինյանի և Ալիևի միջև, ամենայն հավանականությամբ, հայ գերիների՝ Բաքվում տեսակցելու մասին խոսակցություններ եղել են, և թույլ հույս է առաջանում, որ նման նախաձեռնությունը կարող է կյանքի կոչվել։
«Բայց կրկնում եմ՝ եթե Ադրբեջանի օմբուդսմենը հանդիպել է Ռուբեն Վարդանյանին, մեր օմբուդսմենը պետք է անհապաղ արձագանքի և իրականացնի այդ խնդրանքը։ Մենք գիտենք, թե ինչ դաժան պայմաններում են գտնվում Ադրբեջանում ապօրինի կալանքի տակ պահվող մեր համերկրացիները, և արձագանքը պետք է լինի անհապաղ։ Թույլ կտա, թե թույլ չի տա Նիկոլ Փաշինյանը, ՄԻՊ-ը պարտավոր է դրական արձագանքել Ռուբեն Վարդանյանի ուղերձին և համաձայնություն տալ այդ հանդիպմանը, որպեսզի մարդիկ կարողանան Բաքվում տեսակցել իրենց հարազատներին»,- շեշտեց իրավապաշտպանը։
Ժաննա Ալեքսանյանի խոսքով՝ տեսակցության պահանջը պետք է իրականացվի օր առաջ։
«Էլ չեմ ասում գերիների ազատ արձակման մասին։ Սա, իհարկե, քաղաքական հարց է, բայց գիտենք, թե ՀՀ ղեկավարներն այդ հարցում ինչքան պասիվ են։ Հնարավոր է, որ ընտրություններին ընդառաջ՝ նման մի քայլ անեն, քանի որ դա բխում է իրենց իսկ շահերից»,- նշեց մեր զրուցակիցը։
Ամփոփելով՝ իրավապաշտպանը նկատեց՝ նման հարցերում պետության հրապարակային արձագանքը խիստ կարևոր է, իսկ մանավանդ այս դեպքում, երբ մեր հայրենակիցներն ապօրինի են պահվում թշնամու բանտերում, պետք է հնչեն նրանց ազատ արձակման հրապարակային կոչեր։
«ՀՀ իշխանությունները շարունակ հայտարարում են, որ ադրբեջանական կողմի հետ օրուգիշեր բանակցում են հայ գերիների վերադարձի մասին, բայց մենք չենք տեսնում նույնիսկ Հայաստանում ապրող ՀՀ քաղաքացիների նկատմամբ նրանց մարդկային, մարդասիրական վերաբերմունքը։ Եթե բանակցում եք՝ երկու բառ ասեք, տեսնենք՝ ինչ եք բանակցում։ Դա պետք է հրապարակային լինի, բայց քանի որ ամեն ինչ ծածկադմփոցի մեջ է… Շատ լավ կլիներ, թե ՄԻՊ-ը հրապարակային հայտարարություն աներ, և մենք բոլորս տեսնեինք, թե իրենք ինչ ձևով են առաջ շարժվելու։ Համոզված եմ, որ Հայաստանում մեծ մասը շատ մեծ ցանկություն ունի, որ հայ գերիներն ազատ արձակվեն ևվերադառնան հայրենիք»,- նշեց Ժաննա Ալեքսանյանը։
Հիշեցնենք, որ այսօր հրապարակվել է Արցախի նախկին պետնախարար Ռուբեն Վարդանյանի ուղերձը ՀՀ մարդու իրավունքների պաշտպան Անահիտ Մանասյանին։
Ուղերձում Ռուբեն Վարդանյանը նշել է, որ վերջերս հանդիպել է Ադրբեջանի օմբուդսմեն Սաբինա Ալիևայի հետ, և ադրբեջանցի պաշտոնյան նշել է, որ իր հայ գործընկերոջ հետ քննարկել է հայ գերիների հարազատների՝ Բաքու այցելելու հնարավորությունը։ Ըստ Վարդանյանի՝ ադրբեջանական կողմը պատրաստակամություն է հայտնել նպաստել հանդիպման կազմակերպմանը, սակայն այս նախաձեռնությունը դեռևս չի իրականացվել։
Միաժամանակ Ռուբեն Վարդանյանը ՀՀ օմբուդսմենին խնդրել է դիտարկել հայ բանտարկյալների հարազատների՝ Բաքու այցելելու հնարավորությունը՝ նշելով, որ իր կինը՝ Վերոնիկա Զոնաբենդը, պատրաստ է մասնակցել այդպիսի նախաձեռնությանը և այցելել Բաքու։ «Հավանաբար մյուս բանտարկյալների ընտանիքների անդամները ևս պատրաստ կլինեն»,- նշել է Ռուբեն Վարդանյանը։
