Մենք էժանագին քարոզչական թեմաներ չենք քննարկում, իսկ այդ ամբողջ խոսույթը ես գնահատում եմ որպես էժան քարոզչամիջոց, այսօր տեղի ունեցած մամուլի ասուլիսի ժամանակ հայտարարեց «Հայկական խորհուրդ» կազմակերպության ղեկավար, «Խաղաղության կամուրջ» նախաձեռնության հայկական կողմի համակարգող Արեգ Քոչինյանը՝ պատասխանելով այն հարցին, թե Ադրբեջանում հանդիպումների ժամանակ քննարկվե՞լ է 300 հազար ադրբեջանցիների Հայաստանում վերաբնակեցնելու մասին թեզը։
Անդրադառնալով փաստին, որ Ադրբեջանում անձնագրեր են տրամադրում որոշ խմբի քաղաքացիների, որոնք մտադիր են վերադառնալ Հայաստան, Քոչինյանն պատասխանեց.
«Այն փաստաթղթերը, որոնք դուք անձնագրեր եք կոչում, դրանք, ըստ էության, մի հասարակական կազմակերպության կողմից տպած թղթի կտորներ են, դրանք անձնագրեր չեն։ Ընդհանուր առմամբ, այո՛, երկու հասարակություններում էլ կան շատ տարբեր մարդիկ, որոնք ունեն շատ տարբեր նպատակներ, շատ տարբեր պատկերացումներ հակառակ կողմի մասին։
Ի դեպ, մեզանում շատ տարածված մի ֆենոմեն է, որ մենք Ադրբեջանը ընկալում ենք որպես միատարր, մի շերտից բաղկացած մի երևույթ, որն այդպես չի։ Ինչպես մեզ մոտ կան մարդիկ, որոնք շատ կոշտ դիրքորոշում ունեն և ասում են՝ ոչ մի խաղաղություն էլ հնարավոր չի Ադրբեջանի հետ, դա ինքնախաբեությունէ։ Նույնկերպ այնտեղ կան մարդիկ, որոնք ասում են՝ Հայաստանի հետ խաղաղությունը հնարավոր չի։ Ինչպես մեզ մոտ կա խոսույթ, որ թուրքը մնում է թուրք, իրենք էլ ունեն դրա ճիշտ հակառակը՝ հայը մնում է հայ։
Հիմա քննարկում ենք արդյոք մենք մի թեզ, որն անիրատեսական է, անհնարին է և բացահայտ քարոզչական է. ո՛չ չենք քննարկում, որովհետև դրա իմաստը չկա, որովհետև չկա աշխարհի երեսին հնարավորություն, որ Ադրբեջանը չէ, Թուրքիան չէ, Միացյալ Նահանգները չէ, աշխարհի երեսին որևէ պետություն կարողանա կազմակերպել, որպեսզի Հայաստանում 300 000 ադրբեջանցի տեղափոխվի ու բնակվի։
Որովհետև մինչև այս պահը իրենք անգամ Ղարաբաղ չեն կարողացել 100 000 մարդ տեղափոխել, որը գտնվում է իրենց վերահսկողության ներքո»,-նշեց բանախոսը։
