Ամեն շփում մեր դատաիրավական համակարգի հետ ավելի խորացնում է իմ հիասթափությունը, որկարող էի ունենալ, այսօր ընթացող դատական նիստի ընթացքում իր խոսքում ասաց Շիրակի թեմի առաջնորդ Միքայլե արքեպիսկոպոս Աջապահյանը։
«Ես երբևիցե դատաիրավական համակարգի հետ չէի առնչվել, բայց հիմա իջնում ենք դեպի խորխորատ, որի վերջը չի երևում։
Հիմա կա մեկը, որ երբեմն սիրում է սաղմոսներից մեջբերում անել։ Ես իրեն և ձեզ կհիշեցնեմ հետևյալ սաղմոսը. «Դատի՛ր, Տեր նրանց, ովքեր ինձ դատում են»»,- ասաց Սրբազանը։
Դիմելով նիստը նախագահող դատավոր Արմինե Մելիքսեթյանին՝ Միքայել սրբազանը նշեց՝ իր բնակության հասցեն արտաբերելիս պարզ երևաց, թե վերջինս ինչ վերաբերմունք ունի եկեղեցական բարձրաստիճան հոգևորականների նկատմամբ։
«Դուք, պատվարժան դատարան, իմ բնակության հաշվառման հասցեն կարդացիք՝ եպիսկոպոս Սմբատյան: Վստահ եմ՝ Ձեզ մոտ հարց չառաջացավ՝ ով է եպիսկոպոս Սմբատյանը: Բայց ես Ձեզ բացատրեմ. Արտակ եպիսկոպոս Սմբատյանցը Շիրակի թեմի առաջին առաջնորդն էր, որին 1920-ից ի վեր՝ բազմաթիվ անգամներ դատեցին-բաց թողեցին, և ի վերջո 1937 թվականին՝ 61 տարեկան հասակում, հայտնի եռյակը՝ տրոյկան, գնդակահարեց նրան։ Բայց այսօր այդ փողոցը կոչվում է նրա անունով։ Հետո՝ 1953 թվականին՝ համաշխարհային ճիվաղի մահից հետո, Արտակ եպիսկոպոս Սմբատյանցն արդարացվեց։
Իրեն դատողների անունները հայտնի չեն, վստահ եմ՝ նրան դատողների գերազմանին խոտ էլ չի բուսնել։ Այնպես որ, ես Ձեր դատից չեմ վախենում։ Այսօր չլինի, 10 տարի հետո լինի, 50 տարի հետո լինի, իմ մահից հետո լինի՝ ես արդարացվելու եմ։ Բայց Դուք մնալու եք մեղավոր, Դուք ամաչելու եք Ձեր սերունդների առաջ, Ձեր զավակների առաջ։
Մեր ձերբակալութունն այս իշխանությունների խարանն է և խայտառակությունը, և ես չեմ հասկանում, թե Ձեզ ինչն է դրդում մասնակից դառնալ այդ խարանին։ Սա ինձ համար մեծագույն դժբախտություն է, ես ցավում եմ Ձեզ համար, ինչպես կցավամ ցանկացած սխալվածի համար՝ իբրև հոգևորական։
Թարգե՛ք էս խաղը, եթե չթարգեք՝ կհատուցեք»,- իր խոսքն ամփոփեց Սրբազանը։
