Այս պահի դրությամբ, եթե Որոտանի հիդրոկասկադի 120 մլն վարկային ներդրումը, որն ընթացքի մեջ է, գումարենք TRIPP-ը՝ մոտ 200 մլն դոլար, գումարենք NVIDIA-ն, որը 500 և ավելի մլն դոլար է, գումարենք ատոմային էներգետիկան, ապա մեկ մլրդ դոլարի ներդրումային ծրագրեր կան, որոնք շատ շոշափելի են։ Մի մասը նույնիսկ ընթացքի մեջ են։ Այս մասին այսօր լրագրողների հետ զրույցում նշեց էկոնոմիկայի նախարար Գևորգ Պապոյանը։
Անդրադառնալով շրջանառվող լուրերին, որ Միացյալ Նահանգները հետաքրքրված է Հայաստանի հարավում ուրանի հանքերով, նախարարն նկատեց՝ սա աննախադեպ է Հայաստանի պատմության մեջ։
«Նոր ներդրումային ծրագրեր հնարավո՞ր են. իհարկե, ցանկալի՞ են՝ շատ, և կուզենք տեսնել։ Բայց ԱՄՆ փոխնախագահը կգա, բանակցությունները կլինեն։ Այլ մանրամասների ես չեմ տիրապետում»։
Անդրադառնալով նախօրեին Թրամփի ստորագրած հրամանագրերին, որով կարող են մաքսատուրքեր սահմանել բոլոր այն երկրների նկատմամբ, որոնք առևտուր կանեն Իրանի հետ, Պապոյանն ասաց՝ այդ հարցը ևս միանշանակ կքննարկվի Վենսի՝ Երևան այցելության ժամանակ։
«Մոտավորապես 50 մլն դոլարի արտահանում ենք ունեցել նախորդ տարի ԱՄՆ, և այդ ապրանքները իրենց մրցունակությունը կկորցնեն, եթե մաքսատուրքը 10-ից դառնա 25։ Բայց ես գոնե մամուլից եմ իմացել դրա մասին, Էկոնոմիկայի նախարարությունը որևէ բան չի ստացել ԱՄՆ-ի կողմից։
Երկրորդը, կտեսնենք, թե իմպլեմենտացիան ոնց կլինի, բնականաբար, գործընկեր երկրների հետ քննարկումներ տեղի կունենան։ Վենսի հետ բոլոր հարցերը կքննարկվեն։ Ես ձեզ հավաստիացնում եմ, որ օրակարգում ավելի կարևոր ու ավելի հետաքրքիր հարցեր կան։ Դա էլ է կարևոր, բայց ավելի կարևոր հարցեր կան»,- ասաց Պապոյանը։
Ինչ վերաբերում է խոսակցություններին, որ Հայաստանում ամերիկյան մոդելի մոդուլային ատոմակայան է կառուցվելու, նախարարն ասաց, որ տարբեր երկրների հետ քննարկումներ են ընթանում, այդ թվում՝ ԱՄՆ-ի հետ։
«Հայաստանը կընտրի այն տարբերակը, որն իր պետական շահերին ամենահամահունչն է լինելու»,- հավաստիացրեց պաշտոնյան։
Լրագրողները նաև հետաքրքրվեցին՝ արդյոք ԱՄՆ փոխնախագահի հետ քննարկվելու է նաև հայ գերիների թեման։ Նախարարն արձագանքեց.
«Ես կարծում եմ՝ բոլոր հարցերը, որոնք կարող են լինել հայ-ամերիկյան օրակարգում, կքննարկվեն»։
Անդրադառնալով TRIPP նախագծին, Պապոյանն ասաց. «Արդեն մտել ենք առարկայական փուլ։TRIPP-ը արդեն գնացել է, այլևս ոչ ոք չի կարող խանգարել TRIPP-ին»։
Հարցին՝ Ռուսաստանը կարո՞ղ է ներկայացվածություն ունենալ TRIPP-ում, նախարարն ասաց. «TRIPP-ում երկու կողմ կա՝ ԱՄՆ և Հայաստան»։
Նա նաև հայտարարեց, որ Վենսի այցելության շրջանակներում հակաիրանական հարց չկա։
