Ո՞վ կարող է աշխարհում ասել, որ ես չեմ կարող իմ երկիրը պաշտպանել. որևէ մեկը աշխարհում կարող է ասել, թե ես ինչու եմ իմ բանակը ուժեղացնում պաշտպանության նպատակո՞վ, այսօրվա մամուլի ասուլիսի ժամանակ հարցադրումներ հնչեցրեց «Միասնության թևեր» քաղաքական նախաձեռնության ղեկավար Արման Թաթոյանը։
«Դրա համար կան միջազգային բոլոր մեխանիզմները. այստեղ ագրեսիայի հիմքեր չկան։ Այս իշխանությունները մեր ժողովրդի վրա վախ են վաճառում, հիմա էլ նախընտրական քարոզչության ժամանակ քարոզում են՝ վախից ելնելով ընտրել։ Նրանք վախի մեջ են պահում մեր ժողովրդին։
Իսկ ես ասում եմ՝ ժողովո՛ւրդ ջան, հանկարծ չմտածեք, բոլոր լուծումները կան, բոլոր միջազգային մեխանիզմները կան։ Չնեղվե՛ք հանկարծ, պետք չի հուսախաբվել, ընկրկել։ Կան մարդիկ, որոնք պատկերացնում են այդ լուծումները, դրա համար պետք են մասնագետներ, դրա համար պետք է մասնագետ, ոչ թե, որ հելնեն, գնան ամենավտանգավոր իրավիճակներում ներքին քարոզով կուկուռուզ ու պերաշկի ուտելով զբաղվեն։
Ես վստահ եմ, որ գտնելու ենք այդ լուծումները։ Դրա համար մենք պետք է լինենք հետևողական, և մենք լինելու ենք հետևողական այս հարցերում, որովհետև առանց դրա մեր երկրում չի կարող լինել խաղաղություն»,-նշեց Թաթոյանը։
Բանախոսը միաժամանակ շեշտեց՝ ադրբեջանական պետության թեկնածուն Նիկոլ Փաշինյանն է։
«Ակնհայտ է, թե ով է Ադրբեջանի թեկնածուն։ Ես նկատի եմ ունեցել Նիկոլ Փաշինյանին։ Ավելին՝ Ադրբեջանն անգամ չի թաքցնում, որ իր համար մեկ աջակցության թեկնածուն Նիկոլ Փաշինյանն է: Ամեն օր երանի են տալիս, որ Ադրբեջանն իրենց գովի, մի լավ բան ասի»,- նշեց նախկին ՄԻՊ-ը` հավելելով, որ Փաշինյանը կործանում է մեր ինքնիշխանությունը, անկախությունը, մեր ազգային ինքնությունը, և ազգային պետությունն ամեն օր մսխում է։
Նա միաժամանակ նկատեց՝ «Ուժեղ Հայաստան» կուսակցության վարչապետի թեկնածու, բարերար Սամվել Կարապետյանը մեր հայրենակիցն է, որը կարևորագույն և անգնահատելի գործեր է արել Արցախի և Հայաստանի համար։
«Միայն հարգանքի արժանի է, պետք է հպարտանանք, որ նման բարերարներ ունենք։ Ավելին՝ Սամվել Կարապետյանը հիմա անցնում է, իմ կարծիքով, իրավունքների կոպիտ խախտումներով, անօրինակնություններով։ Ես ասել եմ, որ նա պարզապես քաղաքական պատանդ է պահվում, որ թույլ չտան կոնկրետ գործունեություն իրականացնի։ Նրա աջակցությունը Հայոց եկեղեցուն նույնպես ունի անուրանալի նշանակություն»,- ասաց Թաթոյանը։
Միաժամաակ նա նշեց, որ որպես իրավաբան խնդիր է տեսնում, որ մեկ մարդու համար առաջարկում են փոխել ՀՀ Սահմանադրությունը։
«Այսքան տարիներ Հայաստանի պրոբլեմների արմատը հենց նրանում է, որ ամեն ղեկավար փորձել է իր համար հարմարեցնել Սահմանադրությունը։ Դա ինձ համար անընդունելի է»,- ասաց Թաթոյան։
