Քեթրին Անահիտ Պերպերեան (անգլերէն՝ Catherine Anahid “Cathy” Berberian, 4 Յուլիս 1925, Աթլպորօ, Մասսաչուսեթս – 6 Մարտ 1983, Հռոմ, Իտալիա), ծագումով հայ մեծանուն ամերիկեան դասական երգչուհի (մեցցօ-սոփրանօ) եւ երգահան։ Յատկապէս յայտնի է Քլաուտիօ Մոնթեւերտիի, ժամանակակից աւանգարդ ոճի երաժշտութեան, հայկական ժողովրդական երգերու, ինչպէս նաեւ իր սեփական ստեղծագործութիւններու կատարմամբ։
Քեթի Պերպերեանը ծնած է ԱՄՆ-ի Մասսաչուսեթս նահանգի Աթլպորօ քաղաքին մէջ՝ Երուանդ եւ Լուսինէ Պերպերեաններու ընտանիքին մէջ։ Մինչեւ 12 տարեկան ապրած են Աթլպորոյի մէջ, այնուհետեւ ընտանիքը տեղափոխուած է Նիւ Եորք, ուր 1937 թուականին աւարտած է իգական Ճուլիա Ռիչման աւագ դպրոցը։ Վաղ հասակէն հետաքրքրութիւն ցուցաբերած է ինչպէս հայկական ժողովրդական երգ ու երաժշտութեան, այնպէս ալ օփերային երաժշտութեան հանդէպ։ Յաճախած է դաշնամուրի, վոքալի եւ հայկական պարերու դասերու։ Դպրոցական տարիներուն եղած է հայկական ժողովրդական երգի խումբի տնօրէնն ու մենակատարը։ Ընդունուած է Նիւ Եորքի համալսարան, սակայն ուսումը կիսատ ձգած ու միացած է Քոլումպիա համալսարանի թատրոնի եւ երաժշտութեան երեկոյեան դասընթացքներուն։ 1948 թուականին Փարիզի մէջ երաժշտութեան դասեր առած է Մարիա Ֆրիւտէն։ 1949 թուականին ուսանած է Միլանի կոնսերվատորիային մէջ։
Առաջին անգամ բեմ բարձրացած է 1957 թուականին, Նիափոլի մէջ։ Կատարած է դասական եւ օփերային, աշխարհի տարբեր ժողովուրդներու երգեր, ճազ եւ ռոք երգեր։ Մշտապէս իր համերգներուն մէջ տեղ տուած է հայկական երգին։ Ունեցած է ձայնամարզութեան սեփական ստուտիա, զբաղած է մանկավարժութեամբ, գրած է երաժշտական գործեր։ Կատարած է նաեւ Քլաուտիօ Մոնթեւերտիի, ժամանակակից աւանգարդ ոճի երաժշտութեան, հայկական ժողովրդական երգերու, ինչպէս նաեւ իր սեփական ստեղծագործութիւնները։ Անոր ամենայայտնի գործը «Ստրիպսոդիա» վոքալ ստեղծագործութիւնն է (Stripsody, 1966)։
