Ադրբեջանի ներքին գործերի նախարարությունը դիմել է քաղաքացիներին՝ կապված Արցախից զավթված տարածքներ այցելությունների հետ. հայտնում են ադրբեջանական ԶԼՄ–ները:
«Ավելի վաղ բազմիցս նախազգուշացվել էր, որ խաղաղ բնակչության ներթափանցումը օկուպացիայից ազատված տարածքներ՝ առանց թույլտվության, ինչպես նաև վերահսկիչ կետերը շրջանցելը լուրջ վտանգ է ներկայացնում նրանց կյանքի և առողջության համար, ուստի նրանք չպետք է նման գործողություններ կատարեն: Այս տարածքներում շարունակվում են ականազերծման գործողությունները:
Եվս մեկ անգամ հորդորում ենք մեր քաղաքացիներին՝ նման ուղևորություններ չկատարել մինչև տարածքների ականազերծման ամբողջական աշխատանքների ավարտը»,- ասվում է ՆԳՆ հայտարարության մեջ:
Հիշեցնենք, որ ադրբեջանցիները, չդիմանալով գայթակղությանը, հաճախ գաղտնի գնում են Արցախի բռնազավթած տարածքներ՝ թալան և ավերածություններ կատարելու համար, և հաճախ պայթում են ականների վրա։
