Նիկոլ Փաշինյանը հասկանում է , որ Կապանում ՔՊ-ն կարող է պարտություն կրել ու Կապանի այցով փորձել է կարգավորել ՏԻՄ ընտրությունների հետ կապված գործընթացները:Այս մասին «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը:
Արդեն հայտնել ենք, որ երեկ Նիկոլ Փաշինյանը մեկնել էր Կապան՝ մասնակցելու Կապանի ՏԻՄ ընտրություններին ՔՊ-ական թեկնածու Դավիթ Դանիելյանի հոր հոգեհանգստին:
Ըստ Վիգեն Հակոբյանի՝ Նիկոլ Փաշինյանը Կապան կատարած այցով փորձել է համատեղել և՛ կուսակցի հոր հոգեհանգստին մասնակցելը, և՛ նոյեմբերի 14-ին ՏԻՄ ընտրությունների հետ կապված աշխատանքների վերահսկումը.
«Պարզ է, որ եթե հասել է Կապան, ամեն դեպքում համատեղել է հոգեհանգստի մասնակցությունը և ընտրական գործընթացները: Նիկոլ Փաշինյանը հասկանում է, որ բավականին լուրջ վտանգներ կան՝ Կապանում ՔՊ-ն կարող է պարտության մատնվել, առավել ևս, որ նման ռեալ նախադրյալներ կա: Կապանից եկող լուրերը ցույց են տալիս, որ գործող քաղաքապետ Գևորգ Փարսյանը բավականին լուրջ հեղինակություն ունի տեղում, որն անհամեմատելի բարձր է, քան որևէ այլ թեկնածուինը, առավել ևս՝ ՔՊ-ինը»,-ասաց քաղտեխնոլոգը՝ արձանագրելով, որ խորհրդարանական ընտրություններից հետո Սյունիքում տրամադրություններ են փոխվել ՝ «կապված Սյունիքի հեղհեղուկ և անորոշ կարգավիճակի հետ».
«Հատկապես՝ անվտանգության ոլորտում են խնդիրները, որովհետև հիմա Սյունիքը, մասնավորապես՝ Կապանը, դարձել է սահմանամերձ և անվտանգության տեսանկյունից խոցելի: Բացի դրանից, պարզ է, որ համապետական ընտրություններից հետո որևէ լուրջ փոփոխություն մարդկանց կյանքում չի եղել դեպի դրականը, ավելին՝ մարդկանց սոցիալ-տնտեսական վիճակը վատացել է»,-ասաց նա:
Ք
աղտեխնոլոգի խոսքով՝ Նիկոլ Փաշինյանը Գորիսում կրած պարտությունից հետո փորձում է անձամբ կարգավորել ընտրական գործընթացները:
Ըստ Հակոբյանի՝ «իշխանական համակարգում գոյություն ունի մեկ անձնավորություն՝ Նիկոլ Փաշինյան, որն իր վրա է վերցրել ամբողջ գործառույթները».
«Հաղթանակի դեպքում ազդարարվում է, որ դա իր ներդրումն է, պարտության դեպքում՝ Փաշինյանը մեղավորներ է ման գալիս:Ակնհայտ է, որ ՔՊ-ն մեկ մարդու կուսակցություն է, որտեղ բոլոր որոշումներն ընդունում է Փաշինյանը , հաջողության դեպքում ամեն ինչ վերագրվում է իրեն, անհաջողություն դեպքում ինքն առաջինն է մեղավորներ ման գալիս»,-ասաց փորձագետը՝ հավելելով՝ «Նիկոլ Փաշինյանի ամենագլխավոր խնդիրներից մեկն այն է, որ շատ թույլ քաղաքական թիմ ունի»:
Հատկանշական է, որ Նիկոլ Փաշինյանը Կապան էր գնացել ոչ թե Գորիս- Կապան միջպետական ավտոճանապարհով, որի մի հատվածը Ադրբեջանի վերահսկողության տակ է հայտնվել, այլ՝ Տաթևի գրունտային` այժմ վերանորոգվող ճանապարհով։
Ը
ստ զրուցակցի՝ «Փաշինյանը համարում է, որ դա Ադրբեջանի տարածք է, և որոշել է, որ ավելի լավ է Հայաստանի տարածքով անցնի».
«Չեմ կարծում, եթե ցանկություն ունենար Գորիս-Կապան ճանապարհով երթևեկել, ապա նախօրոք չէր պայմանավորվի՝ օրինակ Ալիևի հետ, որ որևէ միջադեպ չլինի, բայց ներկայիս իշխանությունները, առանց դեմարկացիայի և դելիմիտացիայի, քաղաքական մակարդակով ընդունել և կարգավիճակ տվել Գորիս-Կապան ճանապարհին, որ այն գտնվում է Ադրբեջանի տարածքում:
Իրենք համարում են, որ Գորիս-Կապան ճանապարհն ադրբեջանական է, բայց կա նաև այլ տարբերակ, որը Հայաստանի տարածքով է անցնում, և նախընտրում են, ամեն դեպքում, իրենց պատկերացրածով՝ Հայաստանի տարածքով երթևեկել,իրենց պատկերացմամբ՝Գորիս-Կապանն այլևս Հայաստանի տարածք չէ»,-ասաց Վիգեն Հակոբյանը:
Աղբյուր` Փաստինֆո
