Թուրքիայի նախագահ Ռեջեփ Թայիփ Էրդողանը պարտավորվել է Մարմարա ծովը փրկել «ծովային լորձի» բռնկումից, ինչը տագնապ է առաջացրել ծովային կենսաբանների ու բնապահպանների մոտ. հայտնում է Associated Press-ը:
Ծովային լորձի հսկայական զանգվածը՝ խիտ, լպրծուն նյութ, որը կազմված է ծովային օրգանիզմների արտազատվող միացություններից, շատացել է Մարմարա ծովում, ինչպես նաև հարակից Սև և Էգեյան ծովերում:
Թուրքիայի նախագահ Ռեջեփ Թայիփ Էրդողանը հայտարարել է, որ Մարմարա ծով թափված չմշակված թափոնները և կլիմայի փոփոխությունը ծովային պլանկտոնի ծաղկման պատճառ են դարձել: Ստամբուլը՝ Թուրքիայի ամենամեծ քաղաքը, որի բնակչությունը մոտ 16 միլիոն է, և հինգ այլ նահանգներ, գործարաններ և արդյունաբերական կենտրոններ սահմանակից են ծովին:
Այս տարի Թուրքիայում ծովային լորձի քանակը հասել է աննախադեպ մակարդակի: «Մենք կփրկենք մեր ծովերը այս աղետալի լորձից», – ասել է Էրդողանը: «Մենք պետք է անենք այս քայլը առանց հապաղելու»:
