«Պարենային անվտանգության հարցը բոլոր երկրների, եթե ոչ համար մեկ, ապա գլխավոր խնդիրներից է, որ պետք է լուծել: Դուք տեսնում եք, որ խնդիրները չեն քչանում, ցորենի միջանցքը փակվեց վերջին իրադարձությունների հետ կապված, և բազմաթիվ աղքատ երկրներում խնդիրը շատ սուր է դրված»,- ԱԺ-ում լրագրողների հետ ճեպազրույցի ժամանակ ասաց ՀՀ էկոնոմիկայի նախարար Վահան Քերոբյանը։
Նա նաև հայտնել է, որ կապված ալյուրի դեֆիցիտի հետ՝ ամեն ինչ անում են, որպեսզի այդ խնդիրը չառաջանա:
Հայաստանի անվտանգության ու պաշտպանության խնդիրը մեծապես ազդում է երկրի տնտեսության վրա։ Քերոբյանի խոսքով՝ մենք ապրում ենք այնպիսի ժամանակներում, երբ ամեն րոպե կարող է նոր բան տեղի ունենալ։
«Կրակոցը նորմալ բան է նույնիսկ Իսրայելում, և այնտեղ տնտեսությունը զարգանում է շատ բարձր տեմպերով, և եթե կրակոցը պետք է չլինի մեր երկրի սուվերենության հաշվին, ապա մենք պետք է փորձենք այննպես անել, որպեսզի կրակոցների միջավայրում կարողանանք զարգացնել մեր տնտեսությունը և օրեցօր դարձնենք մեր երկիրն ավելի ապահով: Ես ցավակցում եմ բոլոր զոհերի ընտանիքներին, բայց կարող է վաղը ես լինեմ զոհը, և ես պատրաստ եմ դրան»:
