Այնպես չէ, որ ՀՀ արդարադատության նախարարությունը շատ անհանգստացած է կոնկրետ որևէ մեկի կամ մի քանի պաշտոնյայի աշխատավարձը բարձրացնելու հանգամանքով։ Այս մասին լրագրողների հետ զրույցում ասաց ՀՀ արդարադատության նախարար Կարեն Անդրեասյանը՝ պարզաբանելով նախարարության կողմից շրջանառության մեջ դրվող նախագծի դրույթները, որով առաջարկվում է բարձրացնել ՀՀ գլխավոր դատախազի և տեղակալների աշխատավարձը։
Անդրեասյանը, պարզաբանելով նախարարության առաջարկությունը, նշեց. «Տրամաբանությունը եղել է հետևյալը. մենք իրականացնում ենք հակակոռուպցիոն ընդհանուր համակարգի բարեփոխման և ռազմավարության իրագործում: Այսինքն՝ նախարարությունը, բացի իր գործառույթներից, նաև անհանգստացած է և կազմակերպում է Հակակոռուպցիոն կոմիտեի ստեղծումը, հակակոռուպցիոն դատարանների ստեղծումը»։
Վերջինս նշեց, որ Հակակոռուպցիոն դատարանում և Հակակոռուպցիոն կոմիտեում աշխատավարձերն ավելի բարձր են, քան՝ Դատախազության այն ստորաբաժանումում, որը դատարանի և կոմիտեի միջև միջին օղակն է, ինչը, ըստ Անդրեասյանի, անտրամաբանական է։ Մասնավորապես, Անդրեասյանը գտնում է, որ անտրամաբանական էր դառնում, որ կոմիտեի քննիչներն ավելի բարձր աշխատավարձ էին ստանալու, քան՝ դատախազները, որոնք զբաղվելու էին հակակոռուպցիոն տրամաբանությամբ։
«Մենք առաջարկեցինք, որ բարձր լինի դատախազներինը, բայց, եթե Գլխավոր դատախազության համապատասխան վարչության պետի աշխատավարձը դարձնում էինք համաչափ քննիչի և դատավորի հետ, ստացվում էր, որ գլխավոր դատախազության վարչության պետն ավելի բարձր աշխտավարձ պետք է ստանա, քան՝ Գլխավոր դատախազի տեղակալն ու գլխավոր դատախազը»,- նշեց Անդրեասյանը՝ հավելելով, որ լուծումն այլ կերպ չէր տեսնում, քան՝ ընդհանուր համակարգում բոլորի աշխատավարձերը բարձրացնելը։ Նախարարը պարզաբանեց, որ տվյալ դեպքում չի քննարկվում որևէ պաշտոնյայի աշխատավարձը բարձրացնել, սա ընդամենը նպատակ է հասկանալու, թե ինչպես պետք է անել, որ հակակոռուպցիոն համակարգը, որն ունի մի քանի անգամ ավելի բարդություններ, ռիսկեր, բարձր աշխատավարձ ստանա։ Անդրեասյանը չբացառեց, որ սա գուցե լավագույն լուծումը չէ, դրա համար էլ դրվել է քննարկման. «Պաշտոնապես դեռ չենք էլ պնդում, որ դա է լավագույն լուծումը»։
Աղբյուր` Փաստինֆո
