Ղրղզստանի ՆԳՆ-ն հարուցել է 11 քրեական գործ Տաջիկստանի հետ սահմանին ծագած հակամարտության առնչությամբ, կիրակի մամուլի ասուլիսի ժամանակ հայտնել է հանրապետության ներքին գործերի փոխնախարար Էրքեբեք Աշիրխոջաեւը:
NEWS.am-ի փոխանցմամբ, այս մասին գրում է ՌԻԱ Նովոստի-ն:«Հարուցվել է ընդհանուր առմամբ 11 քրեական գործ, որոնք ներկայում քննվում են»,-հայտարարել է նա: Փոխնախարարի խոսքով՝ քրեական գործերը հարուցվել են «Սպանություն», «Զանգվածային անկարգություններ», «Անօրինական սահմանահատում», «Խուլիգանություն» եւ «Խաղաղության դեմ հանցագործություններ» հոդվածների հատկանիշներով: Ղրղզստանի զոհված բոլոր 34 քաղաքացիները սպանվել են հրազենից, հայտնել է Աշիրխոջաեւը՝ հավելելով, որ տուժածների ճնշող մեծամասնությունը նույնպես ստացել է հրազենային վնասվածք:«Ղրղզա-տաջիկական պետական սահմանին անցագրային կետերում անվտանգություն ապահովելու նպատակով սահմանամերձ հակամարտության մեկնարկից ի վեր դադարեցված է մարդկանց, տրանսպորտային միջոցների եւ բեռների տեղաշարժը»,-հայտարարել է Ղրղզստանի պետական սահմանային ծառայության մամուլի ներկայացուցիչը:Նրա խոսքով՝ սահմանին իրավիճակը կայուն է, շարունակվում է համատեղ հանձնաժողովի աշխատանքը, որի կազմում են Ղրղզստանի եւ Տաջիկստանի պաշտպանական գերատեսչությունների սպաները:
