Եթե իմ հեռախոսում ծանր հանցագործության նշաններ պարունակող որեւէ ինֆորմացիա կա, ապա դա կգերազանցի անձնական եւ այլ իրավունքները, քանի որ խոսքը հասարակության համար ավելի վտանգավոր հանցագործության մասին է։ Այս մասին լրագրողների հետ զրույցում ասել է կառավարող «Քաղպայմանագիր» խմբակցության պատգամավոր Սիսակ Գաբրիելյանը։
Նրա խոսքով՝ դա էլ հենց ընդունելի պատասխանն է պատգամավոր Հովիկ Աղազարյանի մասին հարցերին, որը երեկ հեռացվել է կառավարող կուսակցության շարքերից, ինչպես նաեւ խմբակցությունից «պետական եւ կուսակցական նշանակության գաղտնի տեղեկության արտահոսքի, ինչպես նաեւ հանրային բարոյականության նորմերի կոպիտ խախտումների» համար։
Նա հավաստիացրել է, որ ծանոթ չէ Աղազարյանի դեմ գործի մանրամասներին։
Գաբրիելյանն ավելացրել է, որ պետական գաղտնիքի տիրապետող պատգամավորի անձնական շփումը տարբերվում է քաղաքացիների անձնական շփումից, որոնք այդ գաղտնիքի կրող չեն հանդիսանում։
