Շիրակի թեմի առաջնորդ Միքայել արքեպիսկոպոս Աջապահյանը վստահեցնում է, որ որևէ քաղաքական ուժի չի միացել։ Նա այդ մասին ասել է «Փաստինֆոյի» հետ զրույցում` մեկնաբանելով ՀՀ պաշտպանության նախկին նախարար Արշակ Կարապետյանի հայտարարությունը։
Երեկ Արշակ Կարապետյանը հրապարակել էր իր, Միքայել արքեպիսկոպոս Աջապահյանի ու Երևանի նախկին քաղաքապետ, ԱԺ նախկին փոխնախագահ Ալբերտ Բազեյանի լուսանկարները և հայտնել «Համահայկական միասնական խորհուրդ» նոր ուժի ստեղծման գործընթացի մեկնարկի մասին։
«Ինձ դիմել են, խնդրել են լինել իրենց հոգևոր պատասխանատուն, հոգևոր խորհրդատուն, ես էլ ասել եմ՝ խնդրեմ, սիրով։ Այդքան բան։ Ես որևիցե խորհրդի կազմում չկամ, չեմ կարող լինել»,– ասել է սրբազանը։
Նա վստահեցրել է, որ քաղաքական գործունեությամբ զբաղվելու ցանկություն չունի և չի էլ ունեցել։
«Ես տալիս եմ իմ քաղաքական գնահատականները, ակտիվ եմ գնահատականներ հնչեցնելու, վերլուծություններ անելու, կարծիքներ հայտնելու մեջ, բայց քաղաքական գործունեությամբ չեմ զբաղվել, չեմ զբաղվելու, որևէ կառույցի չեմ կարող միանալ, չեմ միանալու, բայց եթե որևէ կառույց դիմում է ինձ, ես իրեն կարող եմ օգտակար լինել իմ հոգևոր խորհրդատվությամբ։ Իմ ներկայությունն այնտեղ այդքանով է»,- նշել է Միքայել սրբազանը։
