Կարեն Հեքիմյանը գրում է. «Ըստ հրապարակված տեղեկությունների, Բուլղարիայում ՀՀ քաղաքացիների իրավունքների խախտումը կրում է համատարած բնույթ:
Ի՞նչ է կատարվում:
ՀՀ քաղաքացիները, ՀՀ տարածքում գործող Բուլղարիայի դեսպանությունից ստանում են Շենգենյան վիզաներ, սակայն նրանց մուտքն այդ երկիր արգելվում է և վերջիններս ստիպված վերադառնում են Հայաստան։
Պատճառաբանությունները տարաբնույթ են`այցելության նպատակի փոփոխություն, հյուրանոցի սխալ ամրագրում, ֆինանսական միջոցների ստուգում և այլն:
Այսօր ՀՀ արտաքին գործերի նախարարություն-ը հայտարարություն տարածեց և, մեծ հաշվով, ՀՀ քաղաքացիներին զգուշացրեց, որ վերջիններս «հանկարծ չխաբեն» դեսպանությանը` չփոփոխեն այցի նպատակը, ժամկետները, հյուրանոցները: Բացի դրանից` ՀՀ ԱԳՆ-ն ՀՀ քաղաքացիներին հորդորեց … «նախապես ուսումնասիրել տվյալ պետության (Բուլղարիայի) միգրացիոն կանոնները, հստակ գնահատել դրանք խախտելու ռիսկերը և հնարավոր բացասական հետևանքները»։
ՀՀ ԱԳՆ-ի հայտարարությունից տպավորություն է ստեղծվում, որ Բուլղարիա մեկնող ՀՀ քաղաքացիները խաբեբա են և անգրագետ: Վերջիններս, բանուգործը թողած, պետք է ուսումնասիրեն Բուլղարիայի օրենսդրությունը, իսկ ՀՀ ԱԳՆ-ում պետք է գնահատեն նրանց առաջադիմությունը: Հայտարարությունում ոչ մի խոսք չկա ՀՀ քաղաքացիներին օտարերկրյա պետություններում, մասնավորապես` Բուլղարիայում, պաշտպանելու ՀՀ ԱԳՆ-ի պարտականության մասին: Իսկ պաշտպանության կարիքը կա, քանզի իրականությունն այլ է, մասնավորապես`
1. Գիտի՞ արդյոք ՀՀ ԱԳՆ-ն ՀՀ-ում որոշ եվրոպական դեսպանություններում` Շենգենյան վիզա ստանալու նպատակով, հերթագրվելու, մուտք գործելու և հարցազրույցին մասնակցելու «նրբերանգների» մասին:
2. Գիտի՞ արդյոք ՀՀ ԱԳՆ-ն, թե ինչպես են վարվում ՀՀ քաղաքացիների հետ Բուլղարիայում:
3. ԱԳՆ-ում թվով քանի՞ վարույթ է իրականացվել օտարերկրյա պետություններում ՀՀ քաղաքացիների բողոքների, ինչպես նաև մամուլի հրապարակումների հիման վրա: Ինչպիսի՞ ավարտ են ունեցել այդ վարույթները:
Միանշանակ է, որ արտերկրում ՀՀ քաղաքացիների իրավունքները պետք է պաշտպանվեն ՀՀ ԱԳՆ-ի կողմից: Սակայն, այսօր ՀՀ ԱԳՆ-ն, ըստ էության, ստանձնեց … Բուլղարիայի «Սահմանապահ ծառայության» անվճար փաստաբանի դերը»:
