Հայաստանում կայանալիք խորհրդարանական ընտրությունների համատեքստում երկրում տեղի է ունենում շատ խորքային քաղաքական գործընթաց։
Երևանի Դավթաշեն վարչական շրջանում «Քաղաքացիական պայմանագիր» կուսակցության քարոզարշավի շրջանակներում քաղաքացիների հետ հանդիպմանն այս մասին ասել է վարչապետ Նիկոլ Փաշինյանը՝ անդրադառնալով քարոզարշավին երեխաների ակտիվ մասնակցությանը։
«Երեխաների ակտիվությունը քարոզարշավին գնալով մեծանում է, և ակնհայտ է, որ այս քաղաքական պրոցեսը ստանալու է «երեխաների հեղափոխություն» անվանումը։ Ամենալավ հեղափոխությունն այն է, որ անում են երեխաները, և, իհարկե, ամենալավ հեղափոխությունն այն է, որը ծառայում է երեխաներին։ Ես հիմա այսպես եմ հասկանում, որ մենք հիմա պարզապես ընտրական քարոզարշավի մեջ չենք։ Հայաստանում տեղի է ունենում շատ խորքային քաղաքական գործընթաց։ Այդ գործընթացն առաջնորդում են մեր երեխաները, որոնք պետք է մեզանից ընդունեն Հայաստանի Հանրապետության էստաֆետը, փոխանցեն իրենց հաջորդ սերնդին, նրանք էլ իրենց հաջորդ սերնդին։ Եվ մենք պետք է արձանագրենք, որ հաղթահարել ենք այն տրամաբանությունը, որ մեր կյանքը պլանավորում ենք Նոր տարուց հետո, տոներից հետո, արձակուրդից հետո։ Մեր պետության համար և մեր պետական կյանքում այն է փոխվել, որ մենք մեր կյանքը պետք է պլանավորենք տասնամյակներով, հարյուրամյակներով, հազարամյակով, որովհետև այսօր ձևակերպվում և շատ խորհրդանշական ձևով երեխաների կողմից որդեգրվում է Հայաստանի Հանրապետության պետականության հարատևության օրակարգը։ Եվ Հայաստանի Հանրապետությունը՝ որպես անվտանգ, երջանիկ, զարգացած, երջանիկ պետություն, պետք է գոյություն ունենա հավիտյան։ Եվ մենք այս խնդիրը պետք է լուծենք, և մենք այս խնդիրը լուծելով ենք զբաղված։ Եվ մեր խնդիրն այլևս առաջիկա ընտրություններով չի պարփակվում։ Մեր ընտրությունը հետևյալի մասին է․ մենք պետք է Հայաստանի Հանրապետությունն առաջիկա ընտրությունների արդյունքներով հենց դուրս բերենք հենց հարյուրամյա և հազարամյա մայրուղի։ Սա է այն ամենակարևոր քաղաքական խնդիրը, որ մենք պետք է լուծենք։ Ամեն ու ամեն օրվա հետ ավելի եմ համոզվում, որ այս խնդրի լուծման ճանապարհին չկա այլևս որևէ խոչընդոտ, որովհետև ես կարծում եմ, ես տեսնում եմ, որ Հայաստանի Հանրապետության ժողովուրղն արդեն կայացրել է իր որոշումը»,- ասել է Փաշինյանը՝ հավելելով, որ հունիսի 7-ին տեղի է ունենալու այդ որոշման ամրագրումը։
Նա կարծիք է հայտնել, որ ՀՀ կառավարությունը, կառավարող մեծամասնությունն ու ժողովուրդը նույն զարկերակի վրա են։ «Ես ուրախ եմ, որ մեր սրտերը բաբախում են նույն ռիթմով։ Սա բացառիկ պատմական իրադրություն է, որ ժողովուրդը և Կառավարությունը նույն զգացողության, նույն զարկերակի և նույն տրամաբանության մեջ են։ Սա պատմական փոփոխություն և պատմական հնարավորություն է»,- նշել է Փաշինյանը։
Infoport
