Ինչպե՞ս է ապահովվում Սյունիքի սահմանի անվտանգությունը։ Այս հարցադրումով այսօր ՀՀ ԱԺ Պաշտպանության և անվտանգության հարցերի մշտական հանձնաժողովի նիստում ՀՀ ԱԱԾ տնօրենի տեղակալ, գեներալ–լեյտենանտ Ստեփան Մելքոնյանին դիմեց «Իմ քայլը» խմբակցության անդամ, ԵԿՄ նախագահ Սասուն Միքայելյանը։
ՀՀ ԱԱԾ տնօրենի տեղակալ, գեներալ–լեյտենանտ Ստեփան Մելքոնյանը վստահեցրեց, որ Սյունիքի սահմանին տեղադրված են սահմանապահ զորքերի ուղեկալներ, ծառայությունն իրականացվում է, բնակչության անվտանգությունն` ապահովվում։
«Հասկանալի է, որ սահմանագծին վերջնական դելիմիտացիա իրականացված չէ, հակառակորդի կողմից էլ նույն վիճակն է, փաստաթղթով կանոնակարգված չէ։ Այստեղ շատ հարցեր են ծագում, որտեղ շատ օպերատիվ միջամտություն է պետք ու տեղում հարցերի կարգվորում»,– ասաց ԱԱԾ տնօրենի տեղակալը։
Մելքոնյանը նշեց, որ Գորիսից Կապան 21 կմ–անոց հատվածը սահմանի ամենաբարդ հատվածն է, որտեղ տեղակայված են նաև ռուսական սահմանապահ զորքեր։
