ԱԺ–ն չընդունեց հայտարարության տեքստը՝ կապված հայ–ադրբեջանական սահմանի վերաբերյալ նոր փաստաթղթի հետ

Ազգային ժողովի արտահերթ նիստում երկարատեւ քննարկումից հետո քվեարկության դրվեց ԱԺ հայտարարության տեքստը, որը սակայն չընդունվեց:

Քվեարկությունից առաջ «Իմ քայլը» խմբակցության ղեկավար Լիլիթ Մակունցը հայտարարեց. «Իմ քայլը խմբակցությունից Վլադիմիր Վարդանյանը եւ «Լուսավոր Հայաստան» խմբակցության պատգամավոր Տարոն Սիմոնյանը քննարկումներ են ունեցել հայտարարության տեքստի շուրջ, որի վերաբերյալ «Իմ քայլը» ունեցել է բովանդակային առաջարկներ: Քանի որ ընդհանուր հայտարարի չի հաջողվել գալ հայտարարության տեքստի վերաբերյալ, ուստի «Իմ քայլը» խմբակցությունը չի մասնակցի քվեարկությանը»:

Քվեարկությանը հայտարարության տեքստին կողմ քվեարկեց ընդամենը 25 պատգամավոր:

Ավելի վաղ NEWS.am-ը հայտնել էր, որ ԱԺ-ն այսօր արտահերթ նիստ էր գումարել, որը նախաձեռնել է «Լուսավոր Հայաստան» խմբակցությունը, եւ որին միացել է նաեւ ԲՀԿ-ն: Օրակարգում հայ–ադրբեջանական սահմանի վերաբերյալ ենթադրյալ նոր փաստաթղթի հնարավոր ստորագրման հարցն է։

Նրանք ԱԺ հայտարարության նախագիծ էին ներկայացրել, որ վերնագրված է. «2021 թվականի մայիսի 12-ից Հայաստանի Հանրապետության տարածքային ամբողջականության խախտման, Հայաստանի Հանրապետության նկատմամբ ուժի կիրառման արդյունքում առաջացած իրավիճակում Հայաստանի Հանրապետության կառավարության կողմից իրականացվող գործողությունների մասին»:

Հիշեցնենք, որ մայիսի 19–ին Սուրբ Աթոռում ՀՀ նախկին դեսպան Միքայել Մինասյանը ֆեյսբուքյան իր էջում գրել էր, որ Նիկոլ Փաշինյանը պատրաստվում է ստորագրել եռակողմ փաստաթուղթ, որով հինգ գյուղ Տավուշում և մեկ գյուղ Արարատում զիջելու է ադրբեջանցիներին մինչև հայ–ադրբեջանական սահմանի վերջնական սահմանազատումը։ Նրա խոսքով՝ Փաշինյանն Ալիևին դեռևս հունվարի 11–ին է բանավոր պայմանավորվածությամբ խոստացել այս զիջումը, սակայն ավելի ուշ փորձել է հետաձգել, խոստումը կատարելու ժամկետները՝ պատճառաբանելով, որ խոստանալիս չգիտեր, որ ընտրություններ են լինելու, ի պատասխան Ալիևը ներխուժել է Սյունիք և Գեղարքունիք։ Փաշինյանը փորձել է պաշտպանություն գտնել Կրեմլում, որտեղից հնչել է երկու հարց. Ինչո՞ւ էր խոստանում, եթե չէր անելու, և ի՞նչ է Կրեմլից իր ակնկալիքը։

Մինասյանը պնդում է, որ այս փաստաթղթի վրա աշխատանքն ավարտված է, այն շուտով կստորագրվի և կհրապարակվի։ Ըստ նրա, փաստաթուղթն ունի նաև գաղտնի հավելված, որում ամրագրված է դեմարկացիայի երկկողմ հանձնաժողովի ստեղծումը և վեց գյուղերի հանձնումը՝ լղոզված ձևակերպումներով։

Այսօր՝ մարտի 20 կառավարության նիստին Փաշինյանը, ըստ էության, չհերքեց այդ փաստաթղթի գոյությունը, ավելին՝ հայտարարեց, որ ինքը պատրաստվում է ստորագրել այն, քանի որ այն «100 տոկոսով բխում է Հայաստանի շահերից»։