Կոչ միջազգային հանրությանը
Աջակցե՛ք, որպեսզի Ադրբեջանը ցմահ ազատազրկման չդատապարտի մարդու իրավունքների համար իր կյանքը նվիրաբերած Ռուբեն Վարդանյանին
Ջենեսիս Արմենիա ուղեղային կենտրոն/հիմնադրամը խստորեն դատապարտում է հասարակական-պետական գործիչ, մարդու իրավունքների պաշտպանության նվիրյալ Ռուբեն Վարդանյանի՝ Բաքվի իշխանությունների կողմից դատական հետապնդման և հնարավոր ցմահ ազատազրկման փորձը։
Ռուբեն Վարդանյանը միջազգային մարդասիրական իրավունքի համաշխարհային պաշտպան է։ Նա հսկայական ռեսուրսներ է ներդրել՝ համաշխարհային մակարդակով կյանքի կոչելու «Ավրորա» միջազգային ֆորումը՝ ձեռք մեկնելով համաշխարհային կոնֆլիկտային կետերում մարդասիրական աշխատանքներ կատարող նվիրյալներին և օգնության կարիք ունեցող ժողովուրդներին։ Նրա նվիրվածությունը հումանիտար արժեքներին հայտնի է ամբողջ աշխարհին։
Ռուբեն Վարդանյանը հանցագործ չէ, ինչպես փորձում է աշխարհին մոլորեցնել Ադրբեջանի բռնատիրական վարչակարգը։ Վարդանյանը մտավորական է, հասարակական և պետական գործիչ, իր ժողովրդի ինքնորոշման և ազատ ապրելու իրավունքի համար պայքարող մարդ։ 2023 թ. սեպտեմբերին Արցախի դեմ Ադրբեջանի սանձազերծած պատերազմի պայմաններում նա նախընտրեց կիսել ժողովրդի ճակատագիրը, գերևարվեց, բայց անպաշտպան չթողեց իր ժողորդի զավակներին։ Ռուբեն Վարդանյանն ամբողջ կյանքում աջակցել է ազատության և արդարության գաղափարների տարածմանը, ժողովրդավարական գործընթացների կայացմանը, ժողովուրդների համերաշխ և խաղաղ համակեցության գաղափարին։
Ադրբեջանում նրա նկատմամբ հարուցված քրեական գործը շինծու է, ապօրինի և ուժեղ հարված՝ արդարությանն ու մարդու իրավունքների հիմնարար սկզբունքներին: Կոչ ենք անում ՄԱԿ-ի Անվտանգության խորհրդի մշտական անդամներին, միջազգային հանրությանը, արդարադատության համաշխարհային կառույցներին, ՄԱԿ-ի մարդու իրավունքների խորհուրդին, ԵԱՀԿ-ին և այլ կազմակերպությունների՝ դատապարտել Ադրբեջանի իշխանությունների այս քայլը, ամեն ճնշում գործադրել, որպեսզի կանխվի Ռուբեն Վարդանյանի անարդարացի դատապարտումը և ապահովվի նրա ազատ արձակումը։
Մարդու իրավունքների պաշտպանության և արդարության սկզբունքները պահանջում են վճռական քայլեր:
