Պակիստանը կարող է ճանաչել Աֆղանստանում «Թալիբան» շարժման կառավարությունը տարածաշրջանի երկրների և համաշխարհային տերությունների հետ խորհրդակցություններից հետո: Այդ մասին չորեքշաբթի հաղորդել է The Express Tribune-ը՝ վկայակոչելով Պակիստանի տեղեկատվության և հեռարձակման նախարար Չաուդի Ֆավադ Հուսեյնին:
«Մենք այդպիսի բանակցություններ ենք վարում տարբեր երկրների, այդ թվում՝ Թուրքիայի և Չինաստանի հետ, և որոշում կկայացնենք Թալիբանի իշխանության հաստատման մոտեցման մասին տարածաշրջանի պետությունների և համաշխարհային տերությունների հետ համապարփակ խորհրդակցություններից հետո», ասել է նա:
«Պակիստանի դիրքորոշումն Աֆղանստանի վերաբերյալ ավելի վաղ հստակ էր, այսօր էլ այդպես է: Մենք ակնկալում ենք, որ թալիբները կհարգեն օրենքի գերակայությունը և մարդու հիմնական իրավունքները», հավելել է Հուսեյնը:
