ԱՄՆ նախագահը զգուշացրել է, որ եթե Ուկրաինայի հարցում շուտով համաձայնություն ձեռք չբերվի, ինքը մեծ մաքսատուրքեր և պատժամիջոցներ կսահմանի այն ամենի վրա, ինչը Ռուսաստանը և հակամարտությունում ներգրավված մյուս երկրները վաճառում են ԱՄՆ-ին։
Չորեքշաբթի օրը նախագահ Դոնալդ Թրամփը կոչ է արել Վլադիմիր Պուտինին անհապաղ դադարեցնել Ուկրաինայի դեմ պատերազմը՝ ասելով, որ եթե դա չրավի, ապա իրադրությունը «միայն ավելի կվատթարանա»։
«Ես չեմ ուզում վնասել Ռուսաստանին: Ես սիրում եմ ռուս ժողովրդին, և ես միշտ շատ լավ հարաբերություններ եմ ունեցել նախագահ Պուտինի հետ…»,- գրել է Թրամփը Truth Social հարթակում։
«Մենք երբեք չպետք է մոռանանք, որ Ռուսաստանը մեզ օգնեց հաղթել Երկրորդ համաշխարհային պատերազմում՝ գրեթե 60 միլիոն կյանքի գնով։ Այս ամենը հաշվի առնելով՝ ես պատրաստվում եմ Ռուսաստանին, որի տնտեսությունը փլուզվում է, և նախագահ Պուտինին՝ շատ մեծ ԾԱՌԱՅՈՒԹՅՈՒՆ ՄԱՏՈՒՑԵԼ»,- ասել է Թրամփը։ – Հանգստացե՛ք և դադարեցրե՛ք այս անհեթեթ պատերազմը: Իրավիճակն ավելի կվատթարանա, եթե «գործարք» չկնքենք, այն էլ մոտակա ժամանակ»։
Հակառակ դեպքում, շարունակեց Թրամփը, նա խոստանում է բարձր տուրքեր, մաքսատուրքեր և պատժամիջոցներ սահմանել այն ամենի վրա, ինչը Ռուսաստանը և հակամարտությունում ներգրավված մյուս երկրները վաճառում են ԱՄՆ-ին։
Նախագահը կոչ է արել դադարեցնել պատերազմը, որը երբեք չէր սկսվի, ըստ Թրամփի, եթե նա լիներ նախագահ:
«Մենք կարող ենք դա անել հեշտ կամ դժվար ճանապարհով, իսկ հեշտ ճանապարհը միշտ ավելի լավն է: Ժամանակն է «գործարք կնքելու»»,- գրել է Թրամփը՝ հավելելով, որ այլևս չպետք է լինեն նոր զոհեր:
Սոցցանցերում գրառումն արվել է այն բանից հետո, երբ Թրամփը երեքշաբթի ասաց, որ Ռուսաստանի դեմ նոր պատժամիջոցները «հավանական են», եթե Մոսկվան չսկսի բանակցություններ Ուկրաինայի դեմ պատերազմը դադարեցնելու համար:
«Մենք խոսում ենք [Ուկրաինայի նախագահ Վոլոդիմիր] Զելենսկու հետ։ Մենք շատ շուտով կխոսենք [Ռուսաստանի] նախագահ Վլադիմիր Պուտինի հետ և կտեսնենք, թե ինչպես է ամեն ինչ ընթանում։ Մենք ուշադիր հետևելու ենք դրան»,- երեքշաբթի ասաց նախագահը` պատասխանելով լրագրողների հարցերին:
«Ամերիկայի ձայն»
