ԱՄՆ նախագահ Ջո Բայդենը կարծում է, որ Ռուսաստանի ղեկավարությունը պետք է «վճարի» ամերիկյան ընտրություններին միջամտելու Մոսկվային վերագրվող փորձերի համար: Այս կարծիքը նա հայտնել է ABC հեռուստաընկերությանը տված հարցազրույցում:
Հաղորդավարը հետաքրքրվեց Բայդենի արձագանքով ԱՄՆ Ազգային հետախուզության տնօրենի գրասենյակի զեկույցի հրապարակման կապակցությամբ: Այնտեղ պնդում է արվում, որ երկրում անցյալ տարվա նախընտրական քարոզարշավի ընթացքում Ռուսաստանի իշխանությունները, իբր, փորձել են վարկաբեկել Բայդենին, ինչպես նաև Դեմոկրատական կուսակցությունը:
«Նա կվճարի», ասել է Բայդենը՝ խոսելով ՌԴ նախագահ Վլադիմիր Պուտինի մասին, – «Մենք երկար զրույց ունեցանք, ես նրան բավական լավ գիտեմ: Զրույցի սկզբում ես նրան ասացի. «Ես ձեզ գիտեմ, դուք՝ ինձ։ Եթե ես իմանամ, որ դա տեղի է ունեցել, պատրաստ եղեք»:
Հեռուստաընկերության հարցին, թե որն է լինելու այդ «գինը», ԱՄՆ նախագահը պատասխանել է. « Դուք շուտով կտեսնեք»:
