Միացյալ Թագավորությունը և ԱՄՆ-ն հուլիսի 4-ին կավարտեն Աֆղանստանից իրենց զորքերի հիմնական մասի դուրսբերումը: Այս մասին ուրբաթ օրը հաղորդել է The Daily Telegraph-ը՝ վկայակոչելով Միացյալ Թագավորության պաշտպանության ղեկավար Նիկոլաս Քարթերի շրջապատից աղբյուրներ:
«Մենք բոլորս երկրից դուրս կգանք հուլիսի 4-ին: Բրիտանական հիմնական առաքելությունը [Աֆղանստանում] նույնպես կավարտվի մինչև հուլիսի 4-ը», ասել է աղբյուրը:
Կոալիցիոն ուժերի ամբողջական դուրս բերումը երկրից պետք է ավարտվի մինչ սեպտեմբերի 11-ը: Միևնույն ժամանակ, ակնկալվում է, որ Քաբուլում դեսպանատների անվտանգության համար այնտեղ դեռևս ներկա կլինեն արևմտյան զինվորականներ:
Ըստ բրիտանացի պաշտոնաթող գեներալ Ռիչարդ Դանաթի, որի խոսքերը մեջբերում է The Daily Telegraph-ը, «ցավալիորեն, շատ հավանական է թվում, որ երկիրը կընկնի քաղաքացիական պատերազմի քաոսի մեջ»:
