Նյու Յորքի դատարանը հունվարի 10-ին նշանակել է ԱՄՆ նորընտիր նախագահ Դոնալդ Թրամփի դատավճիռը՝ նախկին պոռնոդերասանուհի Սթորմի Դենիելսին գումար վճարելու` Trump Organization-ի ֆինանսական փաստաթղթերի կեղծման գործով:
Ինչպես նշվում է, Թրամփը կարող է դատարան ներկայանալ «կա՛մ անձամբ, կա՛մ վիրտուալ»։ Ամերիկացի ընտրված առաջնորդի փաստաբանը պետք է դատարանին տեղեկացնի ոչ ուշ, քան հունվարի 5-ը, թե իր պաշտպանյալն ինչպես է որոշելու մասնակցել նիստին։
Այսպիսով, Թրամփին կդատապարտեն իր երդմնակալությունից 10 օր առաջ, որը տեղի կունենա հունվարի 20-ին։ «Դատարանը դատավճիռ կայացնելու համար իրավական խոչընդոտներ չի տեսնում և տեղյակ է, որ ամբաստանյալի կողմից նախագահական երդում տալուց հետո նրա նկատմամբ անձեռնմխելիություն կսահմանվի, ուստի դատարանը պարտավոր է դատավճիռը նշանակել մինչև 2025 թվականի հունվարի 20-ը», – ասել է դատավոր Խուան Մերչանը։
Նա նաեւ ընդգծել է, որ մտադիր չէ Թրամփին փաստացի բանտարկության դատապարտել։ «Դատարանը հակված չէ ազատազրկման որևէ պատիժ նշանակել», – ասվում է հաղորդագրության մեջ:
Մայիսի վերջին Թրամփը մեղավոր է ճանաչվել ֆինանսական կեղծիքների գործով բոլոր 34 կետերով։ Նա դարձավ ԱՄՆ պատմության մեջ առաջին նախկին նախագահը, որը երդվյալ ատենակալների կողմից դատապարտվեց հանցագործության համար: Դատավճիռը նշանակված էր սեպտեմբերի 18-ին, սակայն նոյեմբերին դատավոր Խուան Մերչանը համաձայնեց հետաձգել դատավճիռը:
