Եվրամիությունը և Միացյալ Նահանգները պայմանավորվել են ակտիվացնել իրենց արժեքների խթանումը ամբողջ աշխարհում: Այս մասին Բրյուսելում ԵՄ-ԱՄՆ գագաթնաժողովին հաջորդած մամուլի ասուլիսում հայտարարել է Եվրոպական խորհրդի ղեկավար Շառլ Միշելը:
«Մենք հաստատել ենք մեր ձգտումը` միջազգային համակարգում աջակցել և խթանել մեր հիմնարար արժեքները`ժողովրդավարությունն ու օրենքի գերակայությունը», ասել է նա: Ըստ Միշելի, ԵՄ-ի ու ԱՄՆ-ի թիմերը մի քանի ամիս ակտիվ աշխատում են համագործակցության հիմնարար պակտ ստեղծելու ուղղությամբ:
Միշելը հայտարարել է, որ Եվրամիությունն ու Միացյալ Նահանգները կստեղծեն աշխատանքային խումբ կլիմայի փոփոխության դեմ պայքարի գործողությունները համակարգելու համար: «Մենք նաև քննարկեցինք կլիմայի փոփոխության հարցը: Մենք որոշեցինք ստեղծել բարձր մակարդակի աշխատանքային խումբ` այս հարցում մեր համագործակցությունն ամրապնդելու համար», ասել է նա:
ԵՄ-ն և ԱՄՆ-ը նաև մտադիր են տարեկան 100 միլիարդ եվրո հատկացնել աղքատ երկրներում կենսաբազմազանությանն աջակցելու համար, հայտնում է ՏԱՍՍ-ը:
