Ադրբեջանի նախագահ Իլհամ Ալիևի՝ ԵՄ-ի, Ֆրանսիայի և Նիդեռլանդների հասցեին հնչեցրած մեղադրանքները չափազանց ցավալի են։
Այս մասին X-ում գրել է ԵՄ դիվանագիտության ղեկավար Ժոզեպ Բորելը։
«Այս անընդունելի հայտարարությունները կարող են խաթարել կլիմայի փոփոխության կոնֆերանսի կարևոր նպատակները և Ադրբեջանի COP29-ի նախագահության վստահելիությունը: Մենք աջակցում ենք Ֆրանսիային և Նիդեռլանդներին։
ԵՄ-ն և նրա անդամ երկրները կլիմայի գլոբալ ֆինանսավորման ամենամեծ ներդրողն են՝ աջակցելով գործընկերներին ամբողջ աշխարհում կլիմայի փոփոխության դեմ պայքարում:
Մենք նաև դատապարտում ենք Ադրբեջանի իշխանությունների հարձակումները ԶԼՄ-ների և հասարակական կազմակերպությունների վրա, որոնք բախվում են երկրում մարդու իրավունքների ճգնաժամային իրավիճակին»,- գրել է նա։
Հիշեցնենք, որ Ադրբեջանի նախագահ Իլհամ Ալիեւը COP29-ի շրջանակում անցկացված Կլիմայի փոփոխության հարցերով փոքր կղզիների վրա գտնվող զարգացող պետությունների առաջնորդների գագաթնաժողովում հնչեցրած ելույթի ժամանակ Ֆրանսիային մեղադրել է անդրծովյան տարածքներում էկոհամակարգերին վնաս հասցնելու եւ մարդու իրավունքների խախտումների համար։
