Եթե Հայաստանի Հանրապետության 15 վարչապետեր մինչ օրս չեն կարողացել Վերին Լարսի այլընտրանքային ճանապարհներ գտնել, կարծում եմ՝ դա ամենահեշտ խնդիրը չէ, և ընդամենը ֆեյսբուքյան գրառմամբ անդրադառնալ Լարսում ստեղծված բարդ իրավիճակին, չեմ կարծում, որ պատշաճ վերաբերմունք է ազգաբնակչության և հատկապես գործարար աշխարհի նկատմամբ՝ մանավանդ որ վարչապետի աշխատակազմի ղեկավար Արայիկ Հարությունյանը մասնագիտությամբ տնտեսագետ չէ։ Azg.am-ի թղթակցի հետ զրույցում այս մասին ասաց տնտեսագետ Թաթուլ Մանասերյանը՝ անդրադառնալով բազմաթիվ հայ տնտեսվարողների ահազանգերին, որ իրենց՝ ապրանքներով բեռնված մեքնենաները ռուսական կողմի խստագույն ստուգումների արդյունքում չեն կարողանում հատել Լարսի անցակետը և մուտքը գործել ՌԴ։
«Հատկապես գործարար աշխարհը ծանր բեռ է կրում. ի վերջո պետական բյուջեն գոյանում է գործարար աշխարհի շնորհիվ, և կարծում եմ, որ առաջին հերթին պետք է հարգանքով վերաբերել այն մարդկանց, որոնք այս ծանր պայմաններում արդյունք են ստեղծում և փորձում են իրենց արտադրանքն արտահանել։
Եթե ավանդական շուկան որևէ մեկին դուր չի գալիս, ապա պետք է ունենալ այլընտրանք։ Իսկ այլընտրանքը տքնաջան աշխատանքի արդյունք է։ Կարծում եմ՝ գործարարներն իրենք էլ են մտածում այլընտրանքի մասին, բայց փաստն այն է, որ հավաքական Արևմուտքը երազում է ռուսական շուկայի մասին, և այսօր էլ արևմտյան երկրները միջնորդավորված կերպով մուտք են գործում ռուսական շուկա։ Ռուսական շուկան ցանկացած գործարարի երազանքն է։ Աշխարհում այդպիսի ընդամենը երեք-չորս շուկա կարող ենք հաշվել, որոնք մեծ գնողունակություն ունեն»,- նշեց Թաթուլ Մանասերյանը։
Ըստ տնտեսագետի՝ Հայաստանը, որպես ռուսական շուկայի այլընտրանք, կարող է դիտարկել արաբական աշխարհ, որը, սակայն, ըստ մեր զրուցակցի, աչքաթող է արվել անկախության տարիներից ի վեր։
«Իհարկե, առանձին էպիզոդներ եղել են, առանձին պայմանագրեր են կնքվել, բայց հետևողականություն չի եղել։ Եղել են երկրներ, օրինակ՝ Իրաքը, որոնք Հայաստանից բառացիորեն ամեն ինչ խնդրել են՝ ինչ տաք, կսպառենք՝ հատկապես գյուղմթերք։ Բայց որքանո՞վ ենք մենք հետամուտ եղել։
Ասել, որ ամեն ինչ այսօր է տեղի ունեցել, այդքան էլ ճիշտ չէ։ Հայաստանի Հանրապետությունը, ցավոք սրտի, բոբիկ է, և կառավարությունը գաղափար չունի, թե ինչ է նշանակում տնտեսական դիվանագիտություն։ Եվ դրա համար էլ Արայիկ Հարությունյանի՝ Լարսի թեմայով գրառումները բացառություն կամ եզակի դեպք չեն»,- նշեց Թաթուլ Մանասերյանը՝ հավելելով, որ պատկան մարմինների համաձայնության դեպքում ինքը և իր նախկին ասպիրանտները պատրաստ են անվճար հիմունքներով օգնել կրթելու գրագետ տնտեսագետներ։
Ըստ Թաթուլ Մանասերյանի՝ երբ վարչապետի աշխատակազմի ղեկավար Արայիկ Հարությունյանն իրեն թույլ է տալիս ֆեյսբուքյան էջում գրել, որ «Որևէ ԼԱՐՍԻ անցակետ փակելը մեր վրա չի ազդի», ստացվում է՝ հարյուր Լարսի անցակետ ունենք, որոնցից միայն մեկի մասին է տվյալ պաշտոնյան հիշատակում։
«Կարծում եմ՝ ԶԼՄ-ները պետք է հասնեն նրան, որ տնտեսության հարցերը կարգավորելու համար աշխատավարձ ստացող մարդիկ մինչև պարգևավճարներ ստանալը վաստակեն իրենց վարձատրությունը և ժողովրդի առջև հաշվետու լինեն»,- ամփոփեց մեր զրուցակիցը։
Հիշեցնենք՝ մինչ բազմաթիվ հայ տնտեսվարողներ ահազանգում են, որ ռուսական կողմը տարբեր պատճառաբանություններով թույլ չի տալիս իրենց բեռնատարները հատեն Լարսի անցակետը, և հայկական մեքենաներն ստիպված վերադառնում են Հայաստան, Արայիկ Հարությունյանը ֆեյսբուքյան իր էջում գրել է.
«Հիմա չափազանց կարևոր է, որ հայերը՝ Հայաստանում և Սփյուռքում գնեն բացառապես հայկական արտադրության ապրանքներ՝ գյուղատնտեսական ապրանքներ, խմիչք, Հայաստանի ընկերությունների կողմից մատուցվող ծառայություններ: Բիզնեսին և հարկ վճարողին նման կերպ աջակցելն Անկախությունն ու Սուվերենությունն ամրապնդելու համար կենսական նշանակության վարքագիծ է:
Որևէ ԼԱՐՍԻ անցակետ փակելը մեր վրա չի ազդի, եթե Հայաստանի բիզնեսը նոր շուկաներ գտնի արտասահմանում ապրող մեր հայրենակիցների տոնական և ոչ տոնական սեղաններին: Ամանորի և Սուրբ ծննդյան տոների սեղաններին պետք է լինի բացառապես հայկական արտադրության բանջարեղեն, միրգ, գինի, կոնյակ, այլ գյուղարտադրանք»։
