Այսօր «Ազնավուր» հիմնադրամին են փոխանցվել և ապագայում թանգարանային ցուցադրություններ կազմակերպելու համար նվիրատվության կարգով ի պահ են տրվել Շառլ Ազնավուրի կյանքին ու գործունեությանը վերաբերող ավելի քան 300 թանգարանային արժեքներ՝ ձայնասկավառակներ, բնօրինակ լուսանկարներ, ամսագրեր, մեծն շանսոնյեի մասնակցությամբ նկարահանված շուրջ 30 կինոֆիլմերի բնօրինակ ազդագրեր, փոստային բացիկներ և այլ նյութեր, որոնք անցյալ տարի ցուցադրվել էին «Քեզ համար, Շառլ» խորագիրը կրող ժամանակավոր ցուցադրության ընթացքում. հայտնում է պատմական գիտությունների դոկտոր Հայկ Դեմոյանը։
«Հազարավոր այցելուներ հնարավորություն ունեցան ծանոթանալ Շառլ Ազնավուրի 100-ամյակի կապակցությամբ կազմակերպված այդ ցուցադրությանը, որը հնարավոր դարձավ Ռալֆ Յիրիկյանի մասնակցությամբ ու գործուն աջակցությամբ:
Մեր համատեղ ջանքերով տարբեր աղբյուրներից ձեռք բերված այս բացառիկ հավաքածուն այսօր պաշտոնապես հանձնվեց «Ազնավուր» հիմնադրամի համահիմնադիր և հոգաբարձուների խորհրդի նախագահ Նիկոլա Ազնավուրին»,-նշել է նա:
